Suriya va Isroil Suvayda viloyatidagi keskinlik fonida o‘t ochishni to‘xtatishga kelishdi. Bu haqda AQShning Turkiyadagi elchisi va Suriya bo‘yicha maxsus vakili Tom Barrak ma’lum qildi.
13-iyul kuni Suriyaning janubiy Suvayda viloyatida druzlar va sunniylarning mahalliy musulmon badaviy qabilalari o‘rtasida to‘qnashuvlar boshlandi. Hukumat qo‘shinlari tartibni tiklash uchun vaziyatga aralashdi, ammo oxir-oqibat druzlarga qarshi badaviylar tomonini oldi.
Suriya prezidenti Ahmad ash-Shara’a o‘n minglab odamlar o‘z uylarini tark etishga majbur bo‘lgan janglarni bostirish uchun viloyatga yana qo‘shin kiritishini ogohlantirdi.
Isroil druzlarni himoya qilib, hukumat kuchlari ustunlariga o‘nlab havo hujumlari uyushtirdi. Shuningdek, Damashq markazidagi Suriya Mudofaa vazirligi qarorgohi binolariga hujum qildi.
Barrak X ijtimoiy tarmog‘idagi sahifasida qoldirgan xabarida sulhni e’lon qilib, AQSH boshchiligidagi tinchlik tashabbusini mintaqadagi ko‘plab davlatlar qo‘llab-quvvatlayotganini ta’kidlagan.
“Isroil bosh vaziri Binyamin Netanyaxu va Suriya prezidenti Ahmad ash-Shara’a AQSH ko‘magida, davlat kotibi Marko Rubio yordamida Turkiya, Iordaniya va qo‘shnilar tomonidan qo‘llab-quvvatlanayotgan o‘t ochishni to‘xtatishga rozi bo‘ldi”, deb yozdi Barrak.
Diplomat kelishuvning hech qanday tafsilotlarini oshkor qilmagan, biroq barcha tomonlarni qurollarini tashlab, tinch qurilishni boshlashga chaqirgan.
“Biz druzlar, badaviylar va sunniylarni qurollarini tashlab, boshqa ozchiliklar bilan birgalikda qo‘shnilari bilan tinchlik va farovonlikda yangi va yagona Suriya o‘ziga xosligini yaratishga chaqiramiz”, deydi AQSH vakili.
Suriya ma’muriyati Suriyada darhol kuchga kiradigan umumiy to‘xtatish rejimini joriy etilganini tasdiqladi.
“Biz barcha tomonlarni, istisnosiz va to‘liq ravishda ushbu qarorga rioya qilishga, harbiy operatsiyalarni zudlik bilan to‘xtatishga, tinch aholini himoya qilishni kafolatlashga, insonparvarlik yordamiga erkin kirishni ta’minlashga chaqiramiz”, deyiladi Suriya prezidenti devonxonasi bayonotida.
Bayonotda ta’kidlanishicha, agar tinchlik kelishuvi buzilsa, hokimiyat “konstitutsiya qoidalari va huquqiy me’yorlarga muvofiq qonuniy choralar”ga ko‘rilishini bildirdi.
Izoh (0)