Xitoylik xakerlar AQSH yadro xavfsizligi tizimiga hujum qildi — Bloomberg

Xitoylik kiberjinoyatchilar AQSH Energetika vazirligining milliy yadroviy xavfsizlik boshqarmasiga hujum uyushtirdi. Bu haqda Bloomberg xabar berdi.

Xakerlar Microsoft SharePoint dasturiy ta’minotidagi zaiflikdan foydalanib, yadro qurolini ishlab chiqarish va demontaj qilish uchun mas’ul bo‘lgan muassasaga kiberhujum uyushtirgan. Ta’kidlanishicha, hujum oqibatida hech qanday maxfiy ma’lumotlar tarqalib ketmagan.

Energetika vazirligi vakili Bloomberg agentligiga hujum uyushtirilganini tasdiqlagan. Xususan, u xakerlik 18-iyul kuni sodir etilib, jiddiy zarar yetmaganini bildirgan. Agentlik ma’lumotlariga ko‘ra, kiberhujumchilar AQSH Ta’lim vazirligi, Florida daromadlar departamenti va boshqa bir qator idoralarga tegishli tizimlarda ham noqonuniy harakatlar sodir etgan.

Microsoft kompaniyasi oldinroq xitoyliklar SharePoint zaifliklaridan foydalangan holda butun dunyo tashkilotlari saytlariga bostirib kirayotganini ma’lum qilgandi. Jumladan ularning 3 ta xakerlik guruhi nomlari ochiqlangandi: Linen Typhoon, Violet Typhoon va Storm-2603.

Microsoft’ning bildirishicha, kompaniya xatoliklarni tuzatgan. Biroq bundan oldin, Bloomberg ma’lumotlariga ko‘ra, AQSHda 60 ta muassasada, jumladan, energetika sohasi tashkilotlari, konsalting firmalari va universitetlarda kiberhujumlar qayd etilgan. Xakerlar dasturiy ta’minotdan Yevropadan Yaqin Sharqqacha bo‘lgan hukumat tizimlarini buzish uchun ham foydalangan.

Ma’lumot uchun, 2023-yil 21-iyul kuni xitoylik xakerlar AQSH Davlat departamenti xodimlarining, jumladan, Shtatlarning Xitoydagi elchisi elektron pochtasini buzib kirgandi. Bundan tashqari, xitoyliklar 2024-yil 31-dekabr kuni AQSH Moliya vazirligi tizimida ham buzg‘unchilik qilib, ko‘plab hujjatlarni o‘g‘irlagandi.