Isroil harbiy havo kuchlari Suriya armiyasining asosan druzlar istiqomat qiluvchi Suvayda shahriga kirgan kontingentini nishonga oldi) Bu haqda BBC xabar berdi.
Druzlar va badaviy qabilalari o‘rtasidagi janglar boshlangan 13-iyul kunidan beri kamida 200 kishi halok bo‘lgan. Isroil bosh vaziri Binyamin Netanyaxu Suvayda hududidagi kuchlarni nishonga olishga buyruq berganini tasdiqladi.
Suriya esa Isroilning bu harakatini qoralab, zarbalar qurolli kuchlar a’zolari va tinch aholining o‘limiga olib kelganini bildirgan. Mamlakat qo‘shinlari Suvaydaga Bashar Asad rejimi 2024-yil dekabrda ag‘darib tashlanganidan beri ilk bor kiritilmoqda.
Druzlar Suriya muvaqqat prezidenti Ahmad Ash-Shara’a hukumatini himoya qilishga va’da berganiga qaramay, ularda yangi ma’muriyatga nisbatan ishonchsizlik saqlanib qolmoqda. Shu paytgacha Suvayda viloyati druz harbiy kuchlari nazorati ostida bo‘lgan. Druzlar Suriya xavfsizlik kuchlariga qo‘shilishga monelik ko‘rsatgan.
Netanyaxu Suriyadagi druzlarga zarar yetkazilishining oldini olishga va’da bergan. Sababi ularning Isroil tomonidan bosib olingan Golan tepaliklarida yashovchi millatdoshlari bilan qalin aloqalari mavjud.
Suriya tashqi ishlar vazirligining 15-iyul kungi bayonotida aytilishicha, Isroil Suriya janubiga qilingan so‘nggi hujumlar va ularning oqibatlari uchun to‘liq javobgarlikni o‘z zimmasiga olgan. Yahudiy davlati mudofaa vaziri Katsning bildirishicha, Isroil samolyotlarining Suriya tanklariga hujumi Suvayda hududidagi druzlarga qilingan tahdidga javoban amalga oshirilgan.
Suriya hukumati esa bayonot chiqarib, mamlakat o‘zining barcha fuqarolarini, “birinchi navbatda druzlar jamoasidagi birodarlarini” himoya qilishga sodiqligi tasdiqlangan.
Suriya bugun havo hujumlari yordamida amalga oshirilgan Isroilning xoinona tajovuzini qoralaydi, deyiladi Suriya TIV bayonotida.
Axios nashrining ta’kidlashicha, Donald Tramp ma’muriyati Isroildan Suriya harbiy kuchlariga zarba berishni to‘xtatishni so‘ragan. Suriya mudofaa vaziri esa 15-iyul kuni Suvaydada o‘t ochish to‘xtatilishi haqida e’lon qilgan.
Suvayda shahrida yashovchilardan birining aytishicha, hududdagi vaziyat halokatli bo‘lib, otishmalar sabab odamlar qishloq tomon qochishga majbur bo‘lgan. Bularning bari Suriya hukumati komendantlik soati e’lon qilgan payta ro‘y bermoqda.
Izoh (0)