Toshkent shahridagi pensionerlar soni bir necha viloyatlardagidan kamroq bo‘lsa-da, olinadigan pensiyalar miqdori eng yuqori bo‘ldi. Bu haqdagi maʼlumotlarni Pensiya jamg‘armasi eʼlon qildi.
Pensiya jamg‘armasi 2025-yil iyul oyi uchun 4,2 million nafar pensionerga jami 6,7 trln so‘m mablag‘lar to‘lab berdi.
Hududlar kesimida eng ko‘p pensionerlar Farg‘ona viloyatida (493,1 nafar) ekanini ko‘rish mumkin. Viloyatdagi pensiya oluvchilarga joriy oy uchun jami 706,2 mlrd so‘m to‘langan. Shu bilan birga, nisbatan yuqori ulushi Samarqand viloyati qayd etilgan bo‘lib, 441,9 mingdan ortiq peisonerga 698,8 mlrd so‘m o‘tkazib berilgan.
Pensiya oluvchilar soni bo‘yicha uchinchi o‘rinni Toshkent viloyati band etgan. Hududning 377,2 mingdan ortiq pensioneriga jami 668,6 mlrd so‘m to‘langan.
Keyingi o‘rinda Toshkent shahri qayd etilganiga qaramay, poytaxtdagi 371,4 ming pensionerga boshqa hududlardagidan sezilarli miqdorda ko‘p bo‘lgan — 820,7 mlrd so‘m to‘langan.
O‘z navbatida Namangan viloyatida ham pensiya oluvchilar ulushi nisbatan yuqori ekanini ko‘rish mumkin. Iyul oyi uchun viloyatning 327,7 ming pensionerga 448,4 mlrd so‘m ajratilgan. Qolgan hududlardagi pensionerlar vaoni va ularga joriy oyga to‘langan mablag‘lar miqdori quyidagicha:
- Qoraqalpog‘iston — 222 593 nafar (353,75 mlrd so‘m);
- Andijon viloyati — 390 928 nafar (538,8 mlrd so‘m) ;
- Buxoro viloyati — 263 249 nafar (431,9 mlrd so‘m) ;
- Jizzax viloyati — 142 489 nafar (217 mlrd so‘m);
- Qashqadaryo viloyati — 375 396 nafar 593,3 mlrd;
- Navoiy viloyati — 140 177 nafar (289,1 mlrd so‘m);
- Sirdaryo viloyati— 106 809 nafar (174,8 mlrd so‘m) ;
- Surxondaryo viloyati—280 822 nafar (412,2 mlrd so‘m) ;
- Xorazm viloyati— 230 226 nafar (348,8 mlrd so‘m) ;
Avvalroq maʼlum qilinganidek, bu raqamlar respublikadagi jami pensionerlar sonini ifodalamaydi. O‘zbekistonda huquqni muhofaza qiluvchi organlar tuzilmalaridan pensiyaga chiqqanlar hisobi va to‘lovlari alohida yuritiladi. U tashkilotlar quyidagilar:
- Prezident davlat xavfsizlik xizmati;
- Davlat xavfsizlik xizmati;
- Mudofaa vazirligi;
- Ichki ishlar vazirligi;
- Bosh prokuraturasi;
- Favqulodda vaziyatlar vazirligi;
- Milliy gvardiyasi;
- Bojxona qo‘mitasi;
- Konstitutsiyaviy sud;
- Oliy sud;
- Sudyalar oliy kengashi.
“Daryo” mazkur tashkilotlardan bir nechtasiga o‘z tuzilmalarida ishlab, pensiyaga chiqqan va hozir pul olayotgan pensionerlar sonini ochiqlashni so‘rab, murojaat qildi. Biroq faqatgina Mudofaa vazirligi tuzilmalarida ishlagan va hozirda pensiya olayotganlar soni 27 ming nafar ekani ochilangan. Qolgan tashkilotlar o‘z tuzilmasidagi pensionerlar soni oshkor etilmasligini maʼlum qilgan.
Statistika qo‘mitasi 2025-yil 1-iyul holatiga ko‘ra, O‘zbekiston aholisi 37 mln 860 ming kishiga yetganini bildirgan.
Izoh (0)