O‘zbekistonda 75 foiz korrupsiyaviy jinoyatlar maishiy shaklda sodir etilayotgani ochiqlandi

Joriy yil 29-iyul kuni prezident Shavkat Mirziyoyev O‘zbekistonda maishiy korrupsiyaga qarshi kurashishga oid taqdimot bilan tanishdi. Bu haqda Prezident matbuot xizmati xabar berdi.

Maʼlum qilinishicha, respublikada korrupsiyaviy holatlarning 75 foizi shahar va tumanlarda maishiy shaklda bo‘lmoqda.

Bugungi kunda prokuratura tizimidagi Huquqni muhofaza qilish akademiyasi va ilmiy-tadqiqot markazida 200 dan ortiq mutaxassis ilm va tahlil bilan shug‘ullanmoqda. Huquq-tartibot idoralarida 100 mingdan ziyod xodim korrupsiyaning oldini olish bo‘yicha ishlayapti.

“Lekin ko‘p hollarda bu illatning sabablari chetda qolib, oqibati bilan kurashilyapti. Korrupsiyaga yo‘l qo‘ymaydigan preventiv choralar hali yetarli emas. Har kuni odamlarning ishi tushadigan hokimlik, kadastr, bank va soliq idoralarida byurokratiya, “korrupsiyaviy tuynuklar” to‘liq yo‘qolgani yo‘q”, deyiladi manbada.

Taqdimotda shu boradagi qo‘shimcha chora-tadbirlar muhokama qilingan.

Qayd etilishicha, mamlakatda 43 ta nazorat idorasi bor. Hamma vazirliklarda komplayens nazorat bo‘limlari tashkil etilgan. Taqdimotda avvalo, ularning samaradorligini oshirish vazifasi qo‘yilgan. Vazirlik va idoralar huzuridagi inspeksiyalarning bu boradagi faoliyatiga ham tanqidiy munosabat bildirilgan.

Prezident korrupsiya faqat kamaygani emas, qancha qismining oldi olinganiga qarab, davlat idoralari faoliyatini baholash kerakligini taʼkidlagan.

Xabarga ko‘ra, respublikada yer ajratish bo‘yicha shaffof tizim joriy qilingan. Lekin joylarda bu borada noqonuniy xatti-harakatlar haligacha uchrab turibdi. Yig‘ilishda kadastr, “O‘zbekkosmos”, qurilish va boshqa tegishli tashkilotlar maʼlumotlarini tahlil qilib, bunday holatlarga butunlay chek qo‘yish shartligi taʼkidlangan.

Prokuratura tizimini to‘liq raqamlashtirish va barcha sohalar ustidan “raqamli nazorat” o‘rnatish zarurligi aytilgan.

Korrupsiyaga qarshi kurashish milliy kengashi yig‘ilishida parlamentning masʼul qo‘mitalariga mahallagacha tushib, korrupsion holatlarning kelib chiqish sabablarini o‘rganish, davlat xaridlarida to‘g‘ridan-to‘g‘ri shartnomalarni kamaytirish, yoshlar o‘rtasida korrupsiyaga murosasizlik muhitini shakllantirish kabi dolzarb masalalarda tavsiyalar berilgan edi.

Taqdimotda bunga masʼullar bajarilgan ishlar to‘g‘risida axborot bergan.