Ўзбекистонда пенсия тақсимоти: энг кўп маблағ қайси ҳудуд аҳолисига тўланмоқда?

Тошкент шаҳридаги пенсионерлар сони бир неча вилоятлардагидан камроқ бўлса-да, олинадиган пенсиялар миқдори энг юқори бўлди. Бу ҳақдаги маълумотларни Пенсия жамғармаси эълон қилди.

Пенсия жамғармаси 2025 йил июль ойи учун 4,2 миллион нафар пенсионерга жами 6,7 трлн сўм маблағлар тўлаб берди.

Ҳудудлар кесимида энг кўп пенсионерлар Фарғона вилоятида (493,1 нафар) эканини кўриш мумкин. Вилоятдаги пенсия олувчиларга жорий ой учун жами 706,2 млрд сўм тўланган. Шу билан бирга, нисбатан юқори улуши Самарқанд вилояти қайд этилган бўлиб, 441,9 мингдан ортиқ пеисонерга 698,8 млрд сўм ўтказиб берилган.

Пенсия олувчилар сони бўйича учинчи ўринни Тошкент вилояти банд этган. Ҳудуднинг 377,2 мингдан ортиқ пенсионерига жами 668,6 млрд сўм тўланган.

Кейинги ўринда Тошкент шаҳри қайд этилганига қарамай, пойтахтдаги 371,4 минг пенсионерга бошқа ҳудудлардагидан сезиларли миқдорда кўп бўлган — 820,7 млрд сўм тўланган.

Ўз навбатида Наманган вилоятида ҳам пенсия олувчилар улуши нисбатан юқори эканини кўриш мумкин. Июль ойи учун вилоятнинг 327,7 минг пенсионерга 448,4 млрд сўм ажратилган. Қолган ҳудудлардаги пенсионерлар ваони ва уларга жорий ойга тўланган маблағлар миқдори қуйидагича:

• Қорақалпоғистон — 222 593 нафар (353,75 млрд сўм);
• Андижон вилояти — 390 928 нафар (538,8 млрд сўм) ;
• Бухоро вилояти — 263 249 нафар (431,9 млрд сўм) ;
• Жиззах вилояти — 142 489 нафар (217 млрд сўм);
• Қашқадарё вилояти — 375 396 нафар 593,3 млрд;
• Навоий вилояти — 140 177 нафар (289,1 млрд сўм);
• Сирдарё вилояти— 106 809 нафар (174,8 млрд сўм) ;
• Сурхондарё вилояти—280 822 нафар (412,2 млрд сўм) ;
• Хоразм вилояти— 230 226 нафар (348,8 млрд сўм) ;

Аввалроқ маълум қилинганидек, бу рақамлар республикадаги жами пенсионерлар сонини ифодаламайди. Ўзбекистонда ҳуқуқни муҳофаза қилувчи органлар тузилмаларидан пенсияга чиққанлар ҳисоби ва тўловлари алоҳида юритилади. У ташкилотлар қуйидагилар:

• Президент давлат хавфсизлик хизмати;
• Давлат хавфсизлик хизмати;
• Мудофаа вазирлиги;
• Ички ишлар вазирлиги;
• Бош прокуратураси;
• Фавқулодда вазиятлар вазирлиги;
• Миллий гвардияси;
• Божхона қўмитаси;
• Конституциявий суд;
• Олий суд;
• Судьялар олий кенгаши.

“Дарё” мазкур ташкилотлардан бир нечтасига ўз тузилмаларида ишлаб, пенсияга чиққан ва ҳозир пул олаётган пенсионерлар сонини очиқлашни сўраб, мурожаат қилди. Бироқ фақатгина Мудофаа вазирлиги тузилмаларида ишлаган ва ҳозирда пенсия олаётганлар сони 27 минг нафар экани очиланган. Қолган ташкилотлар ўз тузилмасидаги пенсионерлар сони ошкор этилмаслигини маълум қилган.

Статистика қўмитаси 2025 йил 1 июль ҳолатига кўра, Ўзбекистон аҳолиси 37 млн 860 минг кишига етганини билдирган.