O‘zbekiston prezidenti Shavkat Mirziyoyev 30-iyul — Xalqlar do‘stligi kuni munosabati bilan aholiga tabrik yo‘lladi.
Davlat rahbari o‘z tabrigida mamlakatda 130 dan ortiq millat va elat vakillari yakdil va tinch hayot kechirayotganini taʼkidlagan. O‘zaro hurmat va hamjihatlik muhiti O‘zbekistonning eng muhim boyliklaridan biri ekani qayd etilgan.
Tabrikda taʼkidlanishicha, so‘nggi yillarda millatlararo munosabatlar sohasida huquqiy va institutsional asoslar mustahkamlangan, davlat va jamoat tashkilotlari o‘rtasida samarali hamkorlik shakllangan. Mamlakatdagi 157 ta milliy-madaniy markaz, 42 ta do‘stlik jamiyati va xorijdagi 100 dan ziyod vatandoshlar birlashmalari bu jarayonda faol ishtirok etmoqda.
Prezident turli millat vakillarining davlat va jamiyat hayotidagi o‘rnini eʼtirof etib, ularning ijtimoiy-iqtisodiy sohalardagi hissasini olqishlagan.
“Ularning orasida deputat va senatorlar, taniqli ishlab chiqarish vakillari, tadbirkorlar, taʼlim, tibbiyot, ilm-fan, madaniyat, adabiyot, sanʼat va sport namoyandalari borligini barchamiz yaxshi bilamiz”, deyiladi tabrik matnida.
Shu bilan birga, prezident Markaziy Osiyo mamlakatlari bilan munosabatlar yangi bosqichga ko‘tarilganini taʼkidlagan. Bunga misol sifatida O‘zbekiston – Qirg‘iziston – Tojikiston chegaralari o‘zaro tutashgan nuqtada “Do‘stlik” stellasi o‘rnatilgani keltirilgan. Mazkur stella yaxshi qo‘shnichilik va strategik sheriklik munosabatlari mustahkamlanib borayotganidan dalolat ekani qayd etilgan.
Tabrik so‘ngida davlat rahbari barcha fuqarolarni O‘zbekistonda tinchlik va barqarorlikni saqlash, yosh avlodni bilimli va bag‘rikeng qilib tarbiyalashga chaqirgan hamda barchaga sog‘lik, muvaffaqiyat va farovonlik tilagan.
Izoh (0)