Toshkent shahrining Yangihayot tumanidagi “Sputnik” hozirgi “Yo‘ldosh” massividagi 409 ta yog‘och uylar buzilishi ma’lum bo‘lgandi. “Daryo” jurnalisti bilan suhbatda bo‘lgan ayrim fuqarolar yog‘och uylarda yashash ularga ma’qul ekanini, qolaversa hudud markazga yaqinligi sabab imkoni bo‘lsa shu yerda qolmoqchiligini bildirgandi. Yog‘och uylar buzilishi va fuqarolarning yangi xonadonlar bilan ta’minlanishiga bosh-qosh bo‘layotgan Toshkent shahar hokimligi qoshidagi Toshkent Invest kompaniyasi direktorining aytishicha, bunday talab bilan chiqayotganlarga ham imkon beriladi.
O‘sha yerda yashab o‘rgangan bo‘lsa, ularga buzilishga tushmagan 9 qavatli “dom”lar bor. O‘sha joylardan ham imkoniyati bo‘lsa, taklif qilinishi belgilangan. Bu investorlar bilan birga ish olib borilayotgan jarayonda vujudga keladigan holat. Har bir holatni o‘rganishga tayyormiz, deydi Toshkent Invest kompaniyasi direktori Bahrom Shokirov.
Mas’ul shuningdek, aholini o‘ylantirayotgan savolga ham javob berdi.
Bir xonali uyga bir xonali beriladi, albatta. Lekin biz uyi buzilayotgan fuqarolarga imkoniyat berib, hozir yashab, egallab turgan hududidan 20 foiz ko‘p hududga ega uyni tanlash imkoniyatini beramiz, dedi u.
“Daryo” jurnalisti bilan suhbatda bo‘lgan fuqarolarning ayrimlari ular yashayotgan hudud daraxtzor bo‘lgani uchun salqin va havosi toza ekanini aytib, ko‘chish niyati yo‘qligini ta’kidlagandi.
Bizga mana shu yog‘och uylar yoqadi. Qulayliklari bor. Biz bu yerga moslashib ketganmiz. Hamma narsa qulay. Masalan yozda eng salqin joy. Odamlar ko‘chada yurishga qiynalmaydi. Yangi domlarga ko‘chishni kimdir yaxshi, kimdir esa yomon deydi. Mening shu yerda qolgim kelyapti. Agar pul masalasini hal qilsa, men qolmoqchiman. Mana shu yog‘och uylarni chiroyli qilib, tashqarisini ko‘kalamzorlashtirishsa, yaxshi bo‘lardi, degandi shunday suhbatdoshlardan biri.
Avvalroq Yangihayotdagi buziladigan yog‘och uy egalari uchun qurilayotgan “dom”lar investorga 1,5 trillion so‘m mablag‘ga tushishi ma’lum bo‘lgandi.
Izoh (0)