Тошкент шаҳрининг Янгиҳаёт туманидаги “Спутник” ҳозирги “Йўлдош” массивидаги 409 та ёғоч уйлар бузилиши маълум бўлганди. “Дарё” журналисти билан суҳбатда бўлган айрим фуқаролар ёғоч уйларда яшаш уларга маъқул эканини, қолаверса ҳудуд марказга яқинлиги сабаб имкони бўлса шу ерда қолмоқчилигини билдирганди. Ёғоч уйлар бузилиши ва фуқароларнинг янги хонадонлар билан таъминланишига бош-қош бўлаётган Тошкент шаҳар ҳокимлиги қошидаги Toshkent Invest компанияси директорининг айтишича, бундай талаб билан чиқаётганларга ҳам имкон берилади.
Ўша ерда яшаб ўрганган бўлса, уларга бузилишга тушмаган 9 қаватли “дом”лар бор. Ўша жойлардан ҳам имконияти бўлса, таклиф қилиниши белгиланган. Бу инвесторлар билан бирга иш олиб борилаётган жараёнда вужудга келадиган ҳолат. Ҳар бир ҳолатни ўрганишга тайёрмиз, дейди Toshkent Invest компанияси директори Баҳром Шокиров.
Масъул шунингдек, аҳолини ўйлантираётган саволга ҳам жавоб берди.
Бир хонали уйга бир хонали берилади, албатта. Лекин биз уйи бузилаётган фуқароларга имконият бериб, ҳозир яшаб, эгаллаб турган ҳудудидан 20 фоиз кўп ҳудудга эга уйни танлаш имкониятини берамиз, деди у.
“Дарё” журналисти билан суҳбатда бўлган фуқароларнинг айримлари улар яшаётган ҳудуд дарахтзор бўлгани учун салқин ва ҳавоси тоза эканини айтиб, кўчиш нияти йўқлигини таъкидлаганди.
Бизга мана шу ёғоч уйлар ёқади. Қулайликлари бор. Биз бу ерга мослашиб кетганмиз. Ҳамма нарса қулай. Масалан ёзда энг салқин жой. Одамлар кўчада юришга қийналмайди. Янги домларга кўчишни кимдир яхши, кимдир эса ёмон дейди. Менинг шу ерда қолгим келяпти. Агар пул масаласини ҳал қилса, мен қолмоқчиман. Мана шу ёғоч уйларни чиройли қилиб, ташқарисини кўкаламзорлаштиришса, яхши бўларди, деганди шундай суҳбатдошлардан бири.
Аввалроқ Янгиҳаётдаги бузиладиган ёғоч уй эгалари учун қурилаётган “дом”лар инвесторга 1,5 триллион сўм маблағга тушиши маълум бўлганди.
Изоҳ (0)