“Daryo” respublikada faoliyat yurituvchi hokimlarning xizmat avtomobillari rusumini o‘rganishda davom etadi. Bu safar Toshkent shahar va tuman hokimlarining xizmat mashinalari haqidagi ma’lumotlar bir sahifaga jamlandi.
Ortiqxo‘jayev qanday mashinadan foydalanadi?
Poytaxt hokimligi matbuot xizmatining ma’lum qilishicha, Toshkent shahar hokimi Jahongir Ortiqxo‘jayevning xizmat mashinasi Mercedes-Benz avtomobilining 222 modeli bo‘lib, rangi qora.
Mavzuga doir: “Gazeta.uz”: Toshkent hokimligiga sovg‘a qilingan qimmatbaho Mercedes Jahongir Ortiqxo‘jayevning o‘ziga tegishli
2018-yildan buyon Mirzo Ulug‘bek tumaniga rahbarlik qilayotgan Shavkatbek Irgashev, uch yildirki, Uchtepa tumanini boshqarayotgan Farhod Abdullayev ish vaqtida oq Gentra avtomobilidan foydalanadi.
2019-yilda tadbirkorlikdan davlat boshqaruvi sohasiga kirib kelgan Yakkasaroy tumani hokimi Anvar Sayfutdinovning ham xizmat mashinasi Gentra.
Besh hokimning hamrohi Malibu
2021-yilning iyunida Chilonzor tumani hokimi kursisini egallagan Shavkat Mavlonov, Yangihayot tumaniga ikki yildan beri hokimlik qilayotgan Hayot Inog‘omov, Olmazor tumani hokimi Azizxon Umarxonov hamda Yashnobod tumani hokimi Baxtiyor Rahmonqulovlarning ish paytidagi hamrohi Malibu-2 avtomobili bo‘lib, barchasining rangi qora.
2005–2011-yillarda Toshkent shahri hokimi, 2018–2019-yillarda Qurilish vaziri lavozimida ishlab, 2019-yilda Shayxontohur tumaniga hokim etib tayinlangan Abduqahhor To‘xtayevning xizmat mashinasi esa Malibu-1.
Ikki hokim Captiva’dan foydalanadi
Mirobod tumani hokimi Shuhrat Po‘latov hamda 2020-yilning avgust oyidan beri Sergeli tumanini boshqarib kelayotgan Elbek Shukurov Captiva’dan foydalanadi.
Tracker’dan ham ikki hokim foydalanadi
2021-yilning iyun oyida Bektemir tumani hokimi lavozimiga tayinlangan Tapil Mahamadziyayev va 2022-yilning yanvar oyidan buyon Yunusobod tumanini boshqarayotgan Bahodir Abduvaliyevlarning xizmat mashinasi qora Tracker avtomobilidir.
“Daryo” hokimlarning xizmat avtomobillari rusumi qandayligini o‘rganishda davom etadi.
Mirolim Isajonov tayyorladi
Izoh (0)