Juda ko‘p miqdorda o‘zlashtirish va talon-toroj qilish jinoyatini sodir etgani uchun qidiruvda bo‘lgan O‘zbekiston fuqarosi AQSHda qo‘lga olinib, deportatsiya qilindi. Bu haqda Interpolning O‘zbekistondagi Milliy markaziy byurosi xabar bermoqda.
Qayd etilishicha, ushbu shaxs O‘zbekiston Interpol Milliy markaziy byurosining axborot ko‘magi hamda AQSHning vakolatli organlari o‘rtasidagi yaqin hamkorligi natijasida qo‘lga olinib, O‘zbekistonga qaytarib yuborilgan.
Fuqaro O‘zbekiston Respublikasi Jinoyat kodeksining 167-moddasi 3-qismida nazarda tutilgan (ko‘p miqdorda o‘zlashtirish yoki rastrata yo‘li bilan talon-toroj qilish) jinoyatni sodir etgani uchun qidiruvda bo‘lgan. Ushbu holat yuzasidan jinoyat ishi qo‘zg‘atilgan, ayblanuvchi chet elga qochib, tergovdan yashiringan va xalqaro qidiruvga e’lon qilingan.
Interpol MMB tomonidan AQSH huquqni muhofaza qiluvchi organlari va AQSHning O‘zbekistondagi elchixonasi bilan axborot almashinuvi va muzokaralar natijasida uning deportatsiya qilinishiga erishilgan.
Sankt Peterburgda 2021-yilda sodir etilgan qotillik uchun qidiruvda bo‘lgan O‘zbekiston fuqarosi 28-may kuni Salvadordan ekstraditsiya qilingandi. O‘zbekistonda 9 million dollarni talon-toroj qilishda ayblangan shaxs Rossiyada ushlanib, 15-mayda O‘zbekistonga ekstraditsiya qilingandi. Shuningdek, O‘zbekiston Interpol Milliy markaziy byurosi xalqaro qidiruvda bo‘lgan jinoyatchi ayolni BAAdan chiqarib yuborgandi.
3-iyulda esa Ummondan O‘zbekiston Jinoyat kodeksining 135-moddasida nazarda tutilgan odam savdosida ayblanayotgan fuqaro ekstraditsiya qilingan.
Izoh (0)