Meksikada qurollangan jinoyatchilar Grupo Minero Bacis kompaniyasiga tegishli 33 tonna oltin va kumush konsentrati ortilgan yuk mashinasini talon-taroj qildi. Bu haqda Bloomberg agentligi xabar bermoqda.
Natijada kompaniya millionlab dollar zarar ko‘rgan.
Ma’lumotlarga ko‘ra, bosqinchilar ikkita oq avtomobil bilan yarim tirkamani to‘sib, haydovchi va uni kuzatib borayotgan qo‘riqchilarga hujum qilib, ularni bir yarim soat davomida garovga olishgan. Tinch okeani bo‘yidagi Mansanilo portiga yo‘l olgan yuk mashinasi topilgan, ammo unga biriktirilgan oltin va kumush konsentrati yuklangan tirkama topilmagan.
Aniq moliyaviy yo‘qotishlar hali hisoblab chiqilmagan bo‘lsa-da, Grupo Minero Bacis yo‘qotishlar millionlab dollarga yetishini ma’lum qilgan.
Ta’kidlanishicha, 2025-yilning dastlabki ikki oyida Meksika yo‘llarida talonchilik holatlari o‘tgan yilga nisbatan salkam ikki barobarga oshgan. O‘tgan yil jami 24 mingta yuk o‘g‘irlanishi qayd etilgan edi.
Oltin va kumush konsentratlari asl ma’danga qaraganda qimmatbaho metallarning yuqori miqdorini o‘z ichiga olgan materiallar hisoblanadi.
O‘tgan yili Fransiyaning Pare-le-Monial kommunasidagi muzeydan qurollangan shaxslar milliy boylik sifatida tan olingan zargarlik buyumlarining bir qismini o‘g‘irlab ketilgandi. Mazkur zargarlik buyumlarining taxminiy narxi 7 million yevroni tashkil qiladi.
Izoh (0)