O‘zbekistonda valyuta tushumining bir qismini majburiy sotishdan bo‘yin tovlaganlik uchun ma’muriy javobgarlikni bekor qilish ko‘zda tutilmoqda.
Amalda buning uchun mansabdor shaxslar BHMning 8 baravaridan 12 baravarigacha (3−4,5 million so‘m) jarimaga tortiladi. Bu jarimani bekor qilish ko‘zda tutilgan qonun loyihasi Qonunchilik palatasi deputatlari tomonidan birinchi o‘qishda qabul qilindi.
Valyuta qimmatliklari, qimmatbaho metallar va qimmatbaho toshlar muomalasi bilan bog‘liq munosabatlarni takomillashtirishga qaratilgan qonun loyihasi bilan Jinoyat kodeksi hamda Ma’muriy javobgarlik to‘g‘risidagi kodeksiga qimmatbaho metallar va qimmatbaho toshlarni qonunga xilof ravishda olganlik yoki o‘tkazganlik uchun ma’muriy va jinoiy javobgarlikni nazarda tutuvchi qo‘shimchalar kiritilmoqda.
Shuningdek, qonun hujjatlaridagi valyuta qimmatliklari, qimmatbaho metallar va qimmatbaho toshlar sohasidagi tushunchalar o‘zaro muvofiqlashtirilmoqda.
Bosh prokuratura huzuridagi Iqtisodiy jinoyatlarga qarshi kurashish departamenti boshlig‘i Shamsiddin Sohibnazarovning ma’lum qilishicha, 2020-yildan buyon qimmatbaho metallar va toshlarning noqonuniy muomalasi bilan bog‘liq 99 ta holat aniqlangan. Huquqbuzarliklar natijasida 44 milliard so‘mlik oltin, kumush, olmos va zumradlar musodara qilingan.
Yangi qonun loyihasi valyuta, qimmatbaho metallar va qimmatbaho toshlar sohasidagi qonun hujjatlarini bir xilda qo‘llashga, huquqbuzarliklarning barvaqt oldini olishga qaratilgan.
Izoh (0)