Amerikalik taniqli boks sharhlovchisi, murabbiy va tahlilchi Teddi Atlas o‘z podkastida o‘zbekistonlik bokschi Bahodir Jalolov hamda amerikalik Richard Torres o‘rtasida professional boksda revansh jangini ko‘rishni istashini aytdi. Bu haqda Sports.kz xabar bermoqda.
Atlas ikki bokschi o‘rtasidagi avvalgi jang — 2020 yilgi Tokio Olimpiadasi finalini eslab o‘tdi. O‘sha bahsda Jalolov g‘alaba qozonib, o‘zining ilk Olimpiya oltin medalini qo‘lga kiritgan edi.
Torres — Olimpiya kumush medali sohibi. Taxmin qiling, uni finalda kim yenggan? Albatta, Jalolov. U Olimpiya chempioni bo‘lgan va finalda aynan Torresni mag‘lub etgan. Hozir Bahodirning rekordi 15-0, Torresniki esa 13-0. Kelinglar, bu jangni professional ringda ko‘raylik! Men shuni aytaman: agar Torres yaxshi tayyorlanmasa, u yana mag‘lub bo‘ladi, dedi Atlas.
Ma’lumot uchun, ikki bokschi ham mart oyida ringga chiqqan. Jalolov Qozog‘istonning Ostona shahrida Igor Shevadzutskiy ustidan qiyin g‘alabaga erishgan bo‘lsa, Torres Las-Vegasda italiyalik Guido Vianelloni yengdi.
Avvalroq, Jalolov IBF reytingida 13-o‘rinni egallagani xabar qilingan edi. Torres o‘zbekistonlik charm qo‘lqop ustasidan bir pog‘ona yuqorida joylashgan.
Izoh (0)