Sudanning shimoli-sharqida oltin koni qulashi oqibatida 50 kishi halok bo‘lib, 7 kishi jarohat oldi. Bu haqda Anadolu xabar berdi.
Nil daryosi shtatidagi Huvayd cho‘lida joylashgan shaxta 28-iyun kuni qulab tushgan. Guvohlarning aytishicha, konda ishlayotganlar katta hajmli qum va toshlar ostida qolgan. Yana 7 nafar ishchi tan jarohati olib, shifoxonaga yotqizilgan. Avvalroq kondagi ishlar hayot uchun katta xavf tug‘dirishi sababli uning faoliyati to‘xtatilgan edi.
Qutqaruv ishlariga texnika va professional qutqaruv guruhlarining yo‘qligi to‘sqinlik qilmoqda. Bu esa vayronalar ostidan o‘nlab jasadlarni olib chiqishni sekinlashtirmoqda. Bu konda ikki oy oldin ham shunga o‘xshash baxtsiz hodisa sodir bo‘lib, odamlar jarohat olgandi. Fojia sabab hukumatning zaif nazorati ustidan tanqidlar kuchaygan.
Afrika qit’asida Sudan uchinchi yirik oltin qazib oluvchi mamlakat sanaladi. Ammo hududdagi qazib olish hajmi juda kichik. Yirik sanoat korxonalaridan farqli o‘laroq, bu konlarda xavfsizlik choralari yo‘q. Ularda ko‘pincha turli kasalliklarni keltirib chiqaradigan xavfli kimyoviy moddalardan foydalaniladi.
Mamlakatda kon o‘pirilishlari ham tez-tez uchrab turadi. Shunga o‘xshash hodisada 2023-yil 14 nafar ishchi halok bo‘lgan edi. 2021-yilda esa 38 kishi konda tuproq bosib qolishi oqibatida qurbon bo‘lgan.
Izoh (0)