O‘limni yenggan sevgi haqidagi ta’sirli hikoya 1990-yilning eng ko‘p daromad keltirgan filmi bo‘lib, ikkita “Oskar” mukofotini qo‘lga kiritdi. Jerri Sukerning asari ekranga chiqarilganidan 35 yil o‘tgach, uning bosh qahramonlar hayotiga qanday ta’sir ko‘rsatganini eslaymiz.
Demi Mur
Molli Jensen obrazi Demi Murning karyerasida burilish nuqtasi bo‘ldi. 1980-yillarda u diqqatga sazovor ishlarda qatnashgan bo‘lsa-da, aynan “Ruh” filmi uni Gollivud elitasi safiga olib kirdi. Keyingi o‘n yillik uning faoliyatida yuksalish davri bo‘ldi. Yana bir dramadagi bosh rol unga o‘sha paytda misli ko‘rilmagan 12,5 million dollarlik gonorar hamda eng yuqori maosh oluvchi aktrisa maqomini keltirdi.
Biroq shundan so‘ng Murning karyerasi kutilmaganda inqirozga uchradi. Ketma-ket uchta filmdagi muvaffaqiyatsiz ishtiroki sabab e’tibordan chetda qoldi.
2023-yilda 62 yoshida kutilmagan qaytish yuz berdi. “Substansiya” nomli shov-shuvli bodi-xorror filmidagi keksayayotgan yulduz roli Murga “Oltin globus” mukofotini va ilk bor “Oskar”nominatsiyasini keltirdi.
Patrik Sueyzi
Uit Sueyzi bundan oldin u “Iflos raqslar” filmi bilan dunyoni zabt etgan, unda qo‘shiqchi sifatida ham muvaffaqiyat qozongan edi — uning “She’s Like the Wind” qo‘shig‘i haqiqiy shov-shuvga aylangandi.
“Ruh” filmidan bir yil o‘tgach, u romantik ampluadan voz kechib, “To‘lqinlar uzra” filmida syorfingchi Bodhi rolini ijro etdi. Syujet bo‘yicha unga FQB agenti sifatida Kianu Rivz qarshi turadi. Sueyzi kinoda rol o‘ynashni davom ettirdi va hatto multfilmlarga ham ovoz berdi.
2008-yilda unga oshqozon osti bezi saratoni tashxisi qo‘yildi. Kasalligiga qaramay, u filmlarda suratga tushishni davom ettirdi, tanaffuslarda kimyoterapiya oldi. Biroq 2009-yilda u 57 yoshida vafot etdi.
Sueyzi butun umri davomida yoshligida tanishgan Liza Niemi bilan birga yashadi, ammo farzandli bo‘lishmagan.
Vupi Goldberg
Filmda bashoratchi Oda Mey Braun rolini ijro etgani uchun Vupi Goldberg kinoakademiyaning eng yaxshi ikkinchi darajali aktrisaga beriladigan bosh mukofotiga sazovor bo‘ldi.
Shundan so‘ng u asosan komediya janridagi filmlarda suratga tushdi. Biroq uning muvaffaqiyatli dramatik rollariyam bo‘lgan — masalan, “Okean tubida” trillerida tergovchi obrazini yaratgan.
1994-yilda Goldberg “Oskar” marosimining boshlovchisi sifatida ilk bor chiqish qildi. U, shuningdek, The View ko‘rsatuvini ham muvaffaqiyatli boshqardi hamda jamiyatning ikkiyuzlamachiligini masxara qiluvchi “Kitob” nomli satirik asar yozdi.
Aktrisa Amerikaning to‘rtta eng nufuzli mukofoti — “Emmi”, “Gremmi”, “Oskar” va “Toni” sovrindorlari safiga kiruvchi elita klubning a’zosi hisoblanadi. Uning yutuqlari qatorida ikkita “Oltin globus”, BAFTA mukofoti hamda Shon-sharaf xiyobonida o‘z yulduziga ega.
Toni Golduin
Ko‘pchilik uchun Toni Golduin doimo eng jirkanch antagonistlardan biri — razil Karl Bryuner obrazida qoldi. U Metro-Goldwyn-Mayer studiyasining afsonaviy asoschisi Samuel Goldvinning nabirasi hisoblanadi.
“Ruh” filmi sabab aktyor “yomon odam” qiyofasida qolib ketdi. Ko‘p yillar davomida u jinoiy dramalarga mahkum bo‘lib, ikkinchi darajali qahramonlarni ijro etishga majbur bo‘ldi.
Bugungi kunda Golduin oilasining MGM’ga hech qanday aloqasi yo‘q. Biroq aktyor mashhur qarindoshining shuhrati soyasida qolishni istamaydi. U 2023-yilda “Dada” nomli drama bilan rejissyor sifatida o‘zini ajoyib namoyon etdi. Bu autizm bilan kasallangan o‘g‘lini tarbiyalayotgan stendap-komediyachi (Bobbi Kannavale) haqidagi ta’sirchan hikoya edi. Aytgancha, bosh qahramonning do‘sti va menejerini Vupi Goldberg ijro etgan.
Vinsent Skyavelli
Esingizda bo‘lsa, u metroda gazli ichimlik bankasi ustida o‘tirib, Sem Uaytga arvohlik qobiliyatlarini o‘rgatgandi.
Keyinchalik u Milosh Formanning “Xalq Larri Flintga qarshi” nomli shov-shuvli filmida rol ijro etdi. Tomoshabinlar uni “Betmen qaytadi” filmidagi Pingvinning yordamchisi va “Hali o‘lish vaqti emas”dagi yovuz doktor Kaufmanning obrazlari orqali eslab qolishgan. Kinodan tashqari, Vinsent oshpazlikka jiddiy qiziqadi. Hatto bir nechta kitob ham yozgan.
2005-yil 26-dekabrda aktyor haddan tashqari uzun barmoqlar va oyoq-qo‘llar bilan tavsiflanadigan Marfan sindromi sabab hayotdan ko‘z yumgan.
Izoh (0)