Avstraliyaning Melburn shahridagi sinagogaga hujumchilar tomonidan o‘t qo‘yildi, yahudiy restoraniga esa hujum uyushtirildi. Bu haqda Fox News xabar berdi.
Holat yuzasidan mamlakatdagi yahudiylar rasmiylardan chora ko‘rishni talab qilmoqda. Sinagogaga o‘t qo‘yilganda ichkarida 20 ga yaqin odam kechki ovqat tanovul qilib o‘tirgan bo‘lgan. Mamlakat politsiyasi hozircha hodisani terakt toifasiga kiritmagan.
O‘t o‘chirish brigadasining tezkor harakati sabab Melburndagi yagona bo‘lgan sinagoga saqlab qolingan. Avstraliyada 2024-yili ham Adas Israel sinagogasida portlash va yong‘in sodir bo‘lgan edi.
Yana bir boshqa hodisada 20 ga yaqin niqobli shaxslar Isroilga tegishli “Miznon” restoraniga hujum uyushtirgan. Ular “Isroil mudofaa kuchlariga o‘lim” deb hayqirgan va binoga stullar va shisha idishlarni uloqtirgan. Restorandagi xo‘randalar dahshatga tushib, xavfsiz joyga qochishga majbur bo‘lgan.
Hujumda ayblanganlardan biri Viktoriya politsiyasi tomonidan hibsga olingan. Ammo u qo‘yib yuborilib, unga chaqiruv qog‘ozi berilgan.
Shuningdek, Viktoriya politsiyasi yana bir uchinchi holat bo‘yicha tergov olib bormoqda. Unda huquqbuzarlar 3 ta mashinaga o‘t qo‘yib, bittasini vayron qilgan va yaqindagi devorni bo‘yab tashlagan. Politsiya devordagi tasvirlarda antisemitizm bor-yo‘qligini aytishdan bosh tortgan.
Avstraliya yahudiylari ijroiya kengashi bosh direktori Aleks Rivchin siyosatchilarni hamda barcha avstraliyaliklarni bu “ayanchli jinoyatlarni qoralashga” chaqirgan. Isroil tashqi ishlar vaziri Gideon Saar ham hujumlarni keskin qoralagan.
“Avstraliyada antisemitizm hujumlari haddan tashqari ko‘p sodir bo‘lmoqda. Mamlakat hukumati bu zaharli kasallikka qarshi kurashish uchun ko‘proq harakat qilishi lozim”, dedi Saar.
2023-yil 1-oktyabrdan 2024-yil 30-sentyabrgacha bo‘lgan davrda Avstraliyada 2062 ta antisemitizm harakatlari qayd etilgan.
Izoh (0)