Австралиянинг Мелбурн шаҳридаги синагогага ҳужумчилар томонидан ўт қўйилди, яҳудий ресторанига эса ҳужум уюштирилди. Бу ҳақда Fox News хабар берди.
Ҳолат юзасидан мамлакатдаги яҳудийлар расмийлардан чора кўришни талаб қилмоқда. Синагогага ўт қўйилганда ичкарида 20 га яқин одам кечки овқат тановул қилиб ўтирган бўлган. Мамлакат полицияси ҳозирча ҳодисани теракт тоифасига киритмаган.
Ўт ўчириш бригадасининг тезкор ҳаракати сабаб Мелбурндаги ягона бўлган синагога сақлаб қолинган. Австралияда 2024 йили ҳам Адас Исраэл синагогасида портлаш ва ёнғин содир бўлган эди.
Яна бир бошқа ҳодисада 20 га яқин ниқобли шахслар Исроилга тегишли “Мизнон” ресторанига ҳужум уюштирган. Улар “Исроил мудофаа кучларига ўлим” деб ҳайқирган ва бинога стуллар ва шиша идишларни улоқтирган. Ресторандаги хўрандалар даҳшатга тушиб, хавфсиз жойга қочишга мажбур бўлган.
Ҳужумда айбланганлардан бири Виктория полицияси томонидан ҳибсга олинган. Аммо у қўйиб юборилиб, унга чақирув қоғози берилган.
Шунингдек, Виктория полицияси яна бир учинчи ҳолат бўйича тергов олиб бормоқда. Унда ҳуқуқбузарлар 3 та машинага ўт қўйиб, биттасини вайрон қилган ва яқиндаги деворни бўяб ташлаган. Полиция девордаги тасвирларда антисемитизм бор-йўқлигини айтишдан бош тортган.
Австралия яҳудийлари ижроия кенгаши бош директори Алекс Ривчин сиёсатчиларни ҳамда барча австралияликларни бу “аянчли жиноятларни қоралашга” чақирган. Исроил ташқи ишлар вазири Гидеон Саар ҳам ҳужумларни кескин қоралаган.
“Австралияда антисемитизм ҳужумлари ҳаддан ташқари кўп содир бўлмоқда. Мамлакат ҳукумати бу заҳарли касалликка қарши курашиш учун кўпроқ ҳаракат қилиши лозим”, деди Саар.
2023 йил 1 октябрдан 2024 йил 30 сентябргача бўлган даврда Австралияда 2062 та антисемитизм ҳаракатлари қайд этилган.
Изоҳ (0)