Bir nechta sinagoga (yahudiylar ibodatxonasi)ga o‘t qo‘yishga uringan amerikalik terrorizmda aybdor deb topildi, deb yozadi “TASS”. Ammo Nyu-Jersi shtati Bergen okrugi maslahatchilar sudi 24 yoshli Entoni Gratsianodan og‘irlashtiruvchi vaziyatda sodir etilgan o‘t qo‘yishlar va odamlar hayotiga suiqasd ayblovlarini olib tashladi.
Ayblov materiallariga ko‘ra, 2011—2012-yillarda Gratsiano bir sinagogada vandalizm harakatlarini amalga oshirgan, yana ikkita sinagogani va ravvin (yahudiylar ruhoniysi)ning uyini yoqib yuborishga uringan.
Urinishlarning barchasi turli sabablarga ko‘ra yo‘qqa chiqqan. Uy faqat qisman yongan, qo‘lbola bomba o‘z-o‘zidan o‘chib qolgan, bu vaqtda uyquda bo‘lgan ravvin, uning rafiqasi, besh farzandi va ota-onasi jabr ko‘rmagan.
Gratsianoning advokati sud hukmi ustidan shikoyat arizasini berishini ma’lum qildi. Uning ta’kidlashicha, Gratsiano ushbu xatti-harakatlarni bemulohazalik bilan amalga oshirgan, ammo hech qachon amaldagi terrorchilik tashkilotlaridan hech biriga aloqador bo‘lmagan va ularni qo‘llab-quvvatlamagan.
Izoh (0)