AQSH prezidenti ma’muriyati Garvard universitetini isroillik va yahudiy talabalarning fuqarolik huquqlarini buzganlikda aybladi. Bu haqda BBC xabar berdi.
Ushbu ayblov universitetning federal moliyalashtirilishini yanada xavf ostiga qo‘yishi mumkin. Garvardga yuborilgan hukumat maktubida universitet “o‘zini tahdid ostida his qilgan yahudiy talabalarga ataylab befarqlik qilganlik”da ayblangan.
Garvard va Oq uy o‘rtasidagi munosabatlar so‘nggi bir necha oy ichida keskinlashgan. Universitetga ko‘ra, u diskriminatsiyaga qarshi kurashda “sezilarli qadamlar” qo‘ygan va hukumatning ayblovlariga “mutlaqo qo‘shilmaydi”.
Maktubga ko‘ra, “tegishli o‘zgarishlarni darhol joriy etmaslik Garvard uchun barcha federal moliyaviy resurslarni yo‘qotishga olib keladi”.
“Garvard, albatta, federal imtiyozlarsiz ishlashda davom etishi mumkin. Ehtimol, bunday imkoniyat Garvardning yana gullab-yashnashiga yordam beradi”, deydi universitet prezidenti.
Federal tergovchilar yahudiy talabalarning ko‘pchiligi diskriminatsiyaga uchragani haqida xabar bergan. Ularning to‘rtdan bir qismi jismoniy tahdidga duch kelgani aytilgan. Ushbu xatti-harakatlar orasida yahudiy talabalarga tupurish va kaltaklash holatlari ham bor.
“Garvardning fuqarolik huquqlarini buzish bilan bog‘liq harakatlari universitetni egallab olgan demografik iyerarxiyaning yaqqol namunasidir. Uning irqiy iyerarxiyaga sodiqligi antisemitizmning kuchayishiga imkon berdi”, deyiladi maktubda.
Oq uyda chiqish qilgan matbuot kotibi Karolin Livitt 30-iyun kuni ma’muriyat va Garvard o‘rtasidagi muzokaralar “yopiq eshiklar ortida” davom etayotganini bildirgan.
May oyida ma’muriyat AQSH federal agentliklariga moliyalashtirishni tugatish yoki qayta taqsimlash uchun Garvard universiteti grantlarini qayta ko‘rib chiqishni buyurgan edi. Ma’muriyat umumiy qiymati 100 million funt sterling bo‘lgan 30 ga yaqin shartnomani ko‘rib chiqishini aytgandi.
Hukumat allaqachon 2,65 milliard dollarlik federal grantlarni muzlatib qo‘ygan va Garvardni xalqaro talabalarni qabul qilish imkoniyatidan mahrum qilishga uringandi.
Izoh (0)