Suriya muvaqqat prezidenti Ahmad ash-Shara’a Isroilning mamlakatga hujumlari fonida xalqqa murojaat qildi. Siyosatchi druzlarni himoya qilish Suriya uchun milliy ustuvor vazifa ekanini aytdi. Bu haqda Al Mayadeen xabar berdi.
Siyosatchi o‘z murojaatida asosan druzlar istiqomat qiluvchi Suvayda viloyatidagi tartibsizliklarga to‘xtaldi. Ash-Shara’a “uzoq tarixga ega bo‘lgan suriyaliklar har doim bo‘linishning har qanday shaklini rad etib kelganini” ta’kidladi.
Suriya xalqi Isroilning bizni parchalashga urinishlarini yengishga eng qodir kuch, dedi prezident.
U Suriya tashqi kuchlar siyosatini sinash maydoni emasligini aytib, mamlakatni qayta qurish va milliy birlik atrofida jipslashish uchun umumxalq sa’y-harakatlarini amalga oshirishga chaqirdi.
Yangi Suriyani barpo etish bizdan vatanimiz yonida mustahkam turishni talab qiladi, dedi u.
Druzlarni himoya qilish ustuvor vazifa
Ash-Shara’a Suriyadagi druzlar jamoasining ahamiyatini e’tirof etib, ularni “milliy birlikning ajralmas qismi” deb atadi. Siyosatchi ularni himoya qilish “eng ustuvor vazifa” ekanini ta’kidladi. U Suvaydada yuz bergan bir necha kunlik qonli to‘qnashuvlardan so‘ng tartibni tiklash vazifasini mahalliy guruhlar va druz diniy yetakchilariga topshirishga qaror qilganini aytdi.
Isroil bilan urush qilish yoki druz oqsoqollariga kelishuv tuzishga ruxsat berish tanloviga duch keldik va vatanni himoya qilishni afzal bildik, dedi u.
Prezident Isroilni avvalgi tuzum qulaganidan beri Suriyani jang maydoniga aylantirish va mamlakatning ijtimoiy birligini buzishga urinishda aybladi.
Bizning yurtimizda o‘zgalarning maqsadlariga o‘rin yo‘q. Biz Suriyaning qadr-qimmatini tiklaymiz va milliy manfaatni hamma narsadan ustun qo‘yishimiz lozim, deya ta’kidladi Ash-Shara’a.
Ash-Shara’a Suriya davlat muassasalari Suvaydadagi ichki mojarosini to‘xtatishga aralashganini va bu orqali xavfsizlikni tiklashga erishilganini ta’kidladi. Unga ko‘ra, Isroil bu sa’y-harakatlarni buzishga harakat qilgan, biroq “faqat xalqaro vositachilar — AQSH, arab va turk tomonlarning sa’y-harakatlari — vaziyatni yanada keskinlashuvdan saqlab qolgan”.
Suriyadagi vaziyat
Suriyada druzlar va arab qabilalari o‘rtasida qurolli to‘qnashuvlar yuz bergan edi. Mojaro badaviylarga tegishli mashinalar tortib olinishi bilan boshlangan. To‘qnashuvlar oqibatida kamida 30 kishi halok bo‘lgan, 100 dan ortig‘i yaralangan.
Suriya Mudofaa va Ichki ishlar vazirliklari vaziyatni bostirish uchun Suvaydaga qo‘shimcha kuchlarni yuborgan. Biroq ularning harbiy kolonnalari hujumga uchragan. Oqibatda 18 askar halok bo‘lgan, 9 nafari asirga olingan.
Shundan so‘ng Isroil druzlarni himoya qilish da’vosi bilan Suriya armiyasi va Mudofaa vazirligiga qarashli bir nechta obyektga zarbalar bergan. Jumladan, Damashqdagi Suriya bosh shtabi hujumga uchragan, prezident saroyining atrofi nishonga olingan. Tomonlar 16-iyul kuni kechqurun o‘t ochishni to‘xtatish bo‘yicha kelishuvga erishgan. Bunga AQSH, arab davlatlari va Turkiya tashabbus ko‘rsatgani ma’lum qilingan.
Izoh (0)