Yaqin Sharq va Shimoliy Afrikadagi mojarolarda har 5 soniyada bir bola ko‘chiriladi, jarohatlanadi yoki halok bo‘ladi. Bu haqda UNICEF o‘zining so‘nggi hisobotida xabar berdi.
So‘nggi taqdim etilgan ma’lumotlarga ko‘ra, Yaqin Sharq va Shimoliy Afrika mintaqasida 12 milliondan ortiq bola ko‘chishga majbur bo‘lgan. 40 mingdan ortiq bolalar mayib bo‘lgan bo‘lsa, 20 mingga yaqini halok bo‘lgan.
“Mintaqadagi mojarolar tufayli har 5 soniyada bir bola halok bo‘lmoqda. Allaqachon mintaqadagi 220 million bolaning yarmi mojarolardan aziyat chekayotgan mamlakatlarda yashaydi. Biz bu raqamning o‘sishiga yo‘l qo‘ya olmaymiz. Dushmanlik harakatlarini bolalar uchun tugatish ixtiyoriy emas, balki shoshilinch zarurat. Bu axloqiy majburiyat va yaxshi kelajakka olib boradigan yagona yo‘ldir”, dedi UNICEF’ning Yaqin Sharq va Shimoliy Afrika bo‘yicha mintaqaviy direktori Eduard Begbeder.
Bugungi kunda ushbu mintaqada 110 millionga yaqin bola mojarolardan jabr ko‘rgan mamlakatlarda yashaydi. Zo‘ravonlik ularning hayotining deyarli barcha jabhalarini izdan chiqarishda davom etmoqda. Uy-joy, maktab, sog‘liqni saqlash muassasalari va hokazolar vayron bo‘lmoqda. Bolalar muntazam ravishda hayot uchun xavfli vaziyatlar va ko‘chishga duchor bo‘ladi. Bu odatda bolalarga butun umrga tatigulik ruhiy zarbalar beradi.
UNICEF hisob-kitoblariga ko‘ra, 2025-yilda mintaqa bo‘ylab 45 million bola gumanitar yordamga muhtoj bo‘ladi. Bu miqdor 2020-yilda 32 million edi. Atigi 5 yil ichida 41 foizga ko‘payish qayd etilmoqda.
Shu bilan birga, UNICEF ushbu mintaqadagi faoliyati uchun katta mablag‘ yetishmovchiligini boshdan kechirmoqda. Misol uchun, may oyi holatiga ko‘ra, Suriya 78 foiz, Falastin esa 68 foiz moliyalashtirish kamomadiga duch kelgan.
Tashkilotning mintaqadagi mablag‘lari 2026-yilga borib, 20 foizdan 25 foizgacha qisqarishi kutilmoqda. Bu esa butun mintaqa bo‘ylab og‘ir to‘yib ovqatlanmaslikka qarshi kurashish, davolash, mojaro zonalariga toza suv yetkazib berish va halokatli kasalliklarga qarshi emlash dasturlarini xavf ostiga qo‘yadi.
UNICEF mintaqadagi barcha harbiy harakatlarni to‘xtatishga va xalqaro huquqni hurmat qilishga chaqirmoqda. U shuningdek, homiylarni bolalarni qo‘llab-quvvatlashni davom ettirish yoki kuchaytirishga undamoqda.
Izoh (0)