Tailand Konstitutsiyaviy sudi 1-iyul kuni bosh vazir Paetongtarn Shinavatrani siyosatchining axloqiy me’yorlarni buzgani haqidagi ish bo‘yicha sud jarayoni yakunlanmaguncha lavozimidan vaqtincha chetlatdi. Bu haqda Reuters xabar bermoqda.
Bunga yaqinda hukumat rahbariga nisbatan odob-axloq qoidalarini buzganlik va Kambodja sobiq rahbari Hun Sen bilan maxfiy suhbatning oshkor bo‘lgani haqidagi ayblovlar sabab bo‘lgan. Shinavatrani yuqori lavozimdan chetlatish talabi bilan 36 nafar senator murojaat qilgan.
Sud ishni ko‘rib chiqayotgan vaqtda hukumat rahbari vazifasini bosh vazir o‘rinbosari Suriya Juangroongruangkit zimmasiga oladi. Shinavatraning o‘zi vazirlar mahkamasida qolib, madaniyat vazirligini boshqaradi.
Bosh vazirning ishi bilan korrupsiyaga qarshi kurashish idorasi shug‘ullanadi. Idoraning qarori Shinavatraning iste’fosiga olib kelishi mumkin.
Ta’kidlanishicha, mojaro 15-iyunda Shinavatraning Tailand armiyasi qo‘mondonini tanqid qilgan telefon suhbati yozuvi e’lon qilinganidan so‘ng avj olgan. Harbiylar kuchli ta’sirga ega bo‘lgan mamlakatda bunday so‘zlar hukmron koalitsiyada norozilik to‘lqini va bo‘linishga sabab bo‘lgan. 28-iyunda minglab odamlar uning ketishini talab qilib, Bangkok ko‘chalariga chiqishgan.
Muxolifat yaqin kunlarda hukumatga ishonchsizlik votumini talab qilishi kutilmoqda, ko‘chalardagi namoyishchilar esa Shinavatraning iste’fosini talab qilmoqda. U o‘z so‘zlarining muzokara taktikasining bir qismi ekanini aytib, uzr so‘ragan.
Izoh (0)