Apple kompaniyasi iPhone va boshqa qurilmalarda inson ko‘rish qobiliyatiga yaqin darajadagi sifatda foto va video olish imkonini beruvchi yangi kamera texnologiyasi ustida ish olib bormoqda.
Patent hujjatlarida ta’riflanishicha, yangi kamera datchigi 20 daraja yorqinlik darajasini (yoki dinamik diapazonning “stop”larini) ushlashga qodir. Taqqoslash uchun: inson ko‘zi taxminan 20–30 darajali yorqinlikni ajrata oladi, zamonaviy smartfon kameralari esa 10–13 darajani.
Yangi sensor ikki qatlamdan iborat bo‘ladi: yuqori qatlam yorug‘likni qabul qiladi, pastki qatlam esa ma’lumotlarni qayta ishlaydi. Shuningdek, suratlardagi xiralikni kamaytiradi va yorqinlikni boshqaradi. Bu texnologiya iPhone’larda allaqachon foydalanilayotgan sensorlarga o‘xshash (hozirda ularni Sony yetkazib beradi), biroq yangi texnologiya ixchamroq va o‘ziga xos funksiyalarga ega.
Apple kamerasidagi yana bir yangilik bu LOFIC tizimidir. Bu texnologiya yorqinlik darajasiga qarab har bir pikselga turli miqdordagi yorug‘likni saqlab qolish imkonini beradi. Masalan, agar siz yorqin deraza fonida odam suratini olsangiz, kamera bir vaqtning o‘zida ham soya, ham yorug‘ joylardagi tafsilotlarni saqlab qola oladi. Natijada foto sifati pasaymaydi.
Shuningdek, har bir piksel o‘zining alohida sxemasiga ega bo‘lib, qurilmaning isib ketishidan kelib chiqadigan xatoliklarni real vaqt rejimida bartaraf etadi. Bu jarayon tasvir dasturiy jihatdan qayta ishlanmasdan avval, to‘g‘ridan to‘g‘ri chipda amalga oshiriladi.
Agar Apple bu texnologiyani joriy qila olsa, iPhone kamerasi nafaqat hozirgi modellarni, balki ARRI ALEXA 35 kabi ko‘plab professional kinokameralarni ham ortda qoldirishi mumkin.
Avvalroq yangi iPhone 18 Pro va Pro Max’ning old kamerasi ko‘rinmas bo‘lishi ma’lum qilingan edi.
Izoh (0)