Zamonaviy noutbuklarning aksariyati avtomatik zaryad nazorati tizimiga ega. Biroq foydalanuvchilarning ko‘pchiligi hali ham qurilmani doimiy zaryadga ulagan holatda ishlatish batareyaga qanday ta’sir ko‘rsatishini aniq bilmaydi. Bu haqda esa turli qarashlar mavjud. Quyida mutaxassislar fikri va texnik tavsiyalar asosida ushbu masalaga aniqlik kiritamiz.
Agar noutbuk nisbatan zamonaviy model bo‘lsa, uni doimiy ravishda zaryadga ulagan holda ishlatish xavfsizdir. Aksariyat yangi qurilmalarda akkumulyator to‘liq 100% quvvatlangach, zaryadlanish avtomatik tarzda to‘xtaydi va qurilma tarmoq orqali bevosita elektr quvvatini oladi. Bu esa ortiqcha zaryadlanishdan himoya qilib, batareyani asraydi. Ilgari bu funksiyalar mavjud bo‘lmagan bo‘lsa-da, hozirgi noutbuklarda bu tizim zaryad nazorati moduli (kontroller) ichiga kiritilgan.
Ammo muhim jihatlardan biri — qizib ketish haqida unutmaslik lozim. Agar noutbuk yuqori yuklama ostida ishlayotganda isiy boshlasa va shu holatda doim elektr tarmog‘iga ulangan bo‘lsa, batareya qisqa muddatda eskiradi. Chunki litiy-ionli batareyalar yuqori haroratga sezgir: hatto 40–45°C issiqlik ham ularning sig‘imini asta-sekin kamaytiradi.
Yana bir muammo bu batareyadan kam foydalanishdir. Agar quvvat ko‘rsatkichi doimo 100% zaryad holatida tursa-yu, ammo noutbukdan foydalanilmasa, akkumulyatorning ichki kimyoviy jarayonlari ishdan chiqadi. Bu esa uning sig‘imi pasayishiga olib keladi. Shuning uchun batareya faol bo‘lib turishi uchun haftasiga kamida 1–2 marta noutbukni 30–50% gacha ishlatib, keyin qayta zaryadlash tavsiya etiladi.
Mutaxassislar fikricha, ishlab chiqaruvchi kompaniya taklif qiladigan maxsus dasturlardan foydalanish eng yaxshi yechimdir. Masalan, Lenovo, Dell, Asus kabi brendlarning noutbuklarida batareyani 60–80% gacha zaryadlab, cheklab turuvchi ilovalar mavjud. Bu, ayniqsa, noutbukni doim elektr tarmog‘iga ulangan holatda ishlatadigan foydalanuvchilar uchun foydalidir.
Xulosa: Agar noutbuk haddan tashqari qizib ketmasa va siz vaqti-vaqti bilan batareyani ishlatib tursangiz, uni zaryad olish qurilmasiga ulagan holda ishlatish mumkin.
Izoh (0)