Apple компанияси iPhone ва бошқа қурилмаларда инсон кўриш қобилиятига яқин даражадаги сифатда фото ва видео олиш имконини берувчи янги камера технологияси устида иш олиб бормоқда.
Патент ҳужжатларида таърифланишича, янги камера датчиги 20 даража ёрқинлик даражасини (ёки динамик диапазоннинг “стоп”ларини) ушлашга қодир. Таққослаш учун: инсон кўзи тахминан 20–30 даражали ёрқинликни ажрата олади, замонавий смартфон камералари эса 10–13 даражани.
Янги сенсор икки қатламдан иборат бўлади: юқори қатлам ёруғликни қабул қилади, пастки қатлам эса маълумотларни қайта ишлайди. Шунингдек, суратлардаги хираликни камайтиради ва ёрқинликни бошқаради. Бу технология iPhoneʼларда аллақачон фойдаланилаётган сенсорларга ўхшаш (ҳозирда уларни Sony етказиб беради), бироқ янги технология ихчамроқ ва ўзига хос функцияларга эга.
Apple камерасидаги яна бир янгилик бу LOFIC тизимидир. Бу технология ёрқинлик даражасига қараб ҳар бир пикселга турли миқдордаги ёруғликни сақлаб қолиш имконини беради. Масалан, агар сиз ёрқин дераза фонида одам суратини олсангиз, камера бир вақтнинг ўзида ҳам соя, ҳам ёруғ жойлардаги тафсилотларни сақлаб қола олади. Натижада фото сифати пасаймайди.
Шунингдек, ҳар бир пиксел ўзининг алоҳида схемасига эга бўлиб, қурилманинг исиб кетишидан келиб чиқадиган хатоликларни реал вақт режимида бартараф этади. Бу жараён тасвир дастурий жиҳатдан қайта ишланмасдан аввал, тўғридан тўғри чипда амалга оширилади.
Агар Apple бу технологияни жорий қила олса, iPhone камераси нафақат ҳозирги моделларни, балки АRRI ALEХА 35 каби кўплаб профессионал кинокамераларни ҳам ортда қолдириши мумкин.
Аввалроқ янги iPhone 18 Pro ва Pro Maxʼнинг олд камераси кўринмас бўлиши маълум қилинган эди.
Изоҳ (0)