Amerika Qo‘shma Shtatlarining sobiq prezidenti Barak Obama demokratlarni “o‘z-o‘zini tahlil qilishni” to‘xtatib, Donald Tramp boshqaruvi sharoitida qat’iyatli va aniq harakatlar ko‘rsatishga chaqirdi.
“Nolishni va himoyasiz holatda qolib ketishni bas qiling. Demokratlar birlashib, qat’iyatli bo‘lishlari lozim”, dedi u.
Uning fikricha, hozir loqaydlik vaqti emas.
“Agar hafsalangiz pir bo‘lgan va hech narsa qilmayotgan bo‘lsangiz o‘zingizni demokratman deb aytmang. Aynan hozir harakat qilish payti, ayniqsa so‘z erkinligini himoya qilishda”, dedi Barak Obama.
Obama partiyadoshlarini Nyu-Jersi va Virjiniya shtatlaridagi gubernatorlik saylovlariga e’tibor qaratishga undagan va ularni partiya mavqeyini tiklash uchun “boshlang‘ich nuqta” deb atagan.
Sobiq prezident partiya ichidagi kelishmovchiliklarni tanqid qilib, quruq so‘zlardan amaliy yechimlarga o‘tishga chaqirdi.
“Ishchilarni qanchalik yaxshi ko‘rishingiz ahamiyatsiz, agar ular uy-joy sotib ololmasa, chunki shtatingiz qonunlari qurilishni imkonsiz qiladi va hududiy rejalashtirish ko‘p qavatli uylar qurilishini taqiqlaydi”, dedi u partiyadoshlarining ziddiyatlarini ochiq-oydin ko‘rsatib.
Obama Trampning hokimiyatga qaytishi fonida so‘zlagan nutqida Respublikachilar partiyasida “to‘xtatuvchi kuchlar” yo‘qligini ta’kidlagan, ittifoqchilar bilan tarif urushlarini tanqid qilgan va amerikaliklar huquqlariga tahdid solayotgan avtokratik tendensiyalardan ogohlantirgan. Shuningdek, u huquqshunoslik firmalari va universitetlar kabi muassasalarni hukumat bosimiga qarshi turishga chaqirgan.
“Farzandlarimiz va nabiralarimiz uchun o‘z qadriyatlarimiz va mamlakat kelajagini himoya qilishda jasorat ko‘rsatishimiz shart”, deydi Obama.
O‘tgan oyda Barak Obama AQSH ko‘proq avtokratik boshqaruvga “xavfli darajada yaqinlashib qolganidan” ogohlantirib, amerikaliklarni so‘z erkinligi uchun “faqat oson va urfga kirgan paytdagina emas” kurashishga undagan.
“Hozir har birimiz sinovdan o‘tishimiz kerak bo‘lgan vaziyat yuzaga kelmoqda - shunda biz nimaga chin dildan ishonishimizni aniqlab olishimiz lozim bo‘ladi”, deya qo‘shimcha qilgan AQSH sobiq prezidenti.
Bundan avval AQSH prezidenti Donald Tramp o‘zining Truth Social ijtimoiy tarmog‘ida Oq uyning sobiq rahbari Barak Obamani Eron yadro dasturini rivojlantirishda ayblovchi mem joylashtirdi.
Izoh (0)