AQSH davlat kotibi Marko Rubio 3-iyun kuni Markaziy Amerikaning bir qancha nomi oshkor etilmagan hukumat amaldorlari uchun viza cheklovlarini e’lon qildi. Bu haqda Reuters xabar berdi.
Rubioga ko‘ra, qaror majburiy mehnat va kubalik ishchilarni ekspluatatsiya qilish elementlarini o‘z ichiga olgan “Kuba tibbiy missiyasi” dasturi bilan bog‘liq. U amaldorlarning shaxsini ma’lum qilmagan.
“Kuba ishchi kuchi eksporti dasturi ishtirokchilarni tahqirlaydi, korrupsiyalashgan Kuba rejimini boyitadi va aholini o‘z vatanlarida asosiy tibbiy yordamdan mahrum qiladi”, deyiladi Rubio bayonotida.
Kuba Tashqi ishlar vazirligi bunga munosabat bildirmagan. Gavana o‘nlab yillar davomida bunday ayblovlarni rad etib kelgan. Rubio fevral oyida kubalik ishchilarni, xususan, sog‘liqni saqlash xodimlariga viza cheklovlarini kiritgandi. Ularning kubalik amaldorlar bilan aloqasi borligi taxmin qilingan.
Kuba sog‘liqni saqlash tizimi shifokorlar va tibbiyot xodimlarini butun dunyoga yuborish orqali katta daromad ko‘radi. 1959-yildagi so‘l inqilobdan beri Kuba birdamlik uchun butun dunyo bo‘ylab tabiiy ofatlar va kasallik o‘choqlariga shifokorlarni yuborgan. So‘nggi o‘n yillikda ular Gaitidagi vabo va G‘arbiy Afrikadagi ebola bilan kurashgan.
1959-yilgi inqilobda Fidel Kastro hokimiyatni qo‘lga kiritganidan beri Qo‘shma Shtatlar va Kuba o‘rtasidagi munosabatlar keskinlashgan. O‘nlab yillar davomida AQSH savdo embargosi amalda bo‘lgan. AQSHning sobiq senatori va 1950-yillarda Kubadan Floridaga kelgan muhojirlarning o‘g‘li hisoblangan Marko Rubio Barak Obama ma’muriyati davridan beri Gavana bilan normal munosabatlarga qarshi bo‘lgan.
Izoh (0)