Italiyaning “Yuventus” klubi “Manchester Yunayted” hujumchisi Markus Reshfordni sotib olishni istayapti. Bu haqda insayder Janluka Di Marsio o‘zining ijtimoiy tarmoq sahifasida xabar berdi.
Manbaga ko‘ra, turinlik hozirda Reshford bilan shartnoma tuzish imkoniyatlarini ko‘rib chiqmoqda. Ular “Manchester Yunayted” rahbariyatidan futbolchi haqida ma’lumot so‘ragan. Agar “Yuventus” ingliz klubi bilan kelisha olsa, Markus yangi mavsumni A Seriyada o‘tkazishi mumkin.
Avvalroq, 27 yoshli hujumchi Ispaniyaning “Barselona” jamoasiga o‘tishga rozi bo‘lgani va Saudiya Arabistonidan kelgan foydali moliyaviy taklifni rad etgani haqida xabarlar chiqqan edi. Ammo “Barselona” hali ham bu transferni amalga oshira olmayapti. Sababi — klub La Liganing moliyaviy feyr-pley qoidalari sabab futbolchini ro‘yxatdan o‘tkaza olmasligi mumkin.
Ma’lumot uchun, Markus Reshford “Manchester Yunayted” akademiyasi tarbiyalanuvchisi hisoblanadi. U o‘tgan mavsumning ikkinchi yarmini ijara asosida “Aston Villa”da o‘tkazdi va klub safida 17 ta o‘yinda maydonga tushib, o‘z hisobiga 9 ta gol yozdirib qo‘ydi.
Izoh (0)