Shu kunlarda yo‘llarga o‘rnatilgan sun’iy notekisliklar bilan bog‘liq muammolar ijtimoiy tarmoqlarning asosiy mavzusiga aylandi. "Daryo" nashri bunday to‘siqlar o‘rnatilish sababi va ularning ahamiyati borasida xalq fikri bilan qiziqdi.
Sun’iy notekislik — bu yo‘l qismida yo‘l o‘qiga perpendikulyar tarzda joylashgan, tezlikni majburiy pasaytirish uchun mo‘ljallangan maxsus balandlik hisoblanadi. So‘nggi paytlarda haydovchi va tinch aholi orasida ko‘plab muhokamalarga sabab bo‘lmoqda. Misol uchun, poytaxtning birgina Yashnaobod tumanida joylashgan “Mahmur” mahallasidagi birgina ko‘chaning o‘zida 8 ta ana shunday sun’iy to‘siqlar o‘rnatilgan. Muammoning ildizini aniqlash uchun mahalla fuqarolari va haydovchilar fikri o‘rganildi.
“Hamma o‘z hisobidan qo‘ygan, chunki mashinalarning ovozi, shovqinidan uyda o‘tirib bo‘lmay qoldi. Haydovchilar yoqilg‘ini tejash uchun 200 metr naridagi katta yo‘l qolib, mahallani ichidan yurishadi”, deydi Taisa Vladimirovna ismli mahalla faoli.
Shu hududda istiqomat qiluvchi Malohat Abdurahmonovaning aytishicha, bir necha bor hokimiyatga murojaat qilgani, biroq oxir-oqibat sun’iy notekisliklarni o‘z hisobidan o‘rnatishga majbur bo‘lganini aytdi.
Boshqa fuqarolar ham shu kabi fikrlarni bildirdi. Aksariyati bu kabi “lejachiy politseyskiy”lar bolalar xavfsizligi, yoshi katta insonlar tinchligini ta’minlash maqsadida o‘rnatilganini ta’kidlab o‘tdi.
Haydovchilar esa boshqacha fikrda. Ular bu kabi sun’iy do‘ngliklar mashinalarni nosoz holatga keltirishidan tashvishda.
“Mashinani amortizatorini to‘kib tashlaydi-ku, axir. Undan keyin ko‘pchilik kreditga mashina olib haydayapti, bizga ham oson emas”, deydi Ergash Abdusaidov ismli haydovchi.
Yana bir haydovchi — Ismoil Isoqov esa sun’iy notekisliklarning haddan ortiq ko‘pligidan yozg‘irdi.
“Haddan tashqari ko‘p qo‘yishgan. Mahallaga begonalar kirmaydi, taksistlar kirmasa. Har 100 metrga qo‘ygan taqdirda ham tezlikni soatiga 100 kilometrga chiqara olmaydi mashina”, deydi u.
Bu boradagi fikrlaringizni yoki sizni qiynayotgan muammolarni izohlarda yozib qoldiring.
Izoh (0)