Quyidagi aktyor va aktrisalar yana qancha ajoyib filmlarda rol o‘ynashlari mumkin edi. Afsuski, ularning taqdiri boshqacha yakunlandi.
Naya Rivera
Amerikalik aktrisa “Xor” teleserialidagi quvnoq Santana Lopez roli bilan tanilgan va u ko‘plab mukofotlarga sazovor bo‘lgan.
Rivera 2020-yil 8-iyul kuni Kaliforniya shtatidagi Piru ko‘lida ijaraga olingan qayiqda to‘rt yoshli o‘g‘li Jozi topilganidan keyin qidiruvga berilgan. Bola yolg‘iz edi. Qutqaruvchilar yetib kelganida u qutqaruv nimchasida uxlab yotgandi.
Bolaning aytishicha, u onasi bilan cho‘milayotgan bo‘lgan. Keyin Naya bolaga qayiqqa chiqishiga yordam beradi, lekin o‘zi chiqolmaydi. Bolaning so‘zlariga ko‘ra, onasi suv ostiga g‘oyib bo‘lgan. Katta ehtimol bilan Rivera ko‘lda ko‘p uchraydigan kuchli oqim va girdoblarga tushib qolgan. 33 yoshli aktrisaning jasadi qidiruvning 5-kuni topilgan.
Kemeron Boys
Amerikalik aktyor va raqqos “Jessi” komedik seriali, “O‘yinchining kundaligi” va “Avlodlar” filmlaridagi bosh rollari bilan tanilgan.
Kemeron 20 yoshida — 2019-yil 6-iyuldan 7-iyulga o‘tar kechasi uyqusida vafot etadi. Keyinchalik o‘lim sababi epilepsiya xuruji sifatida keltiriladi. Aktyor uzoq vaqtdan beri surunkali xastalikdan aziyat chekib kelgan, biroq Kemeronning qarindoshlari aniq tashxisni ma’lum qilmagan.
Chedvik Bouzman
Marvel kinoolamidagi Qora pantera roli uchun Chedvik Bouzman nufuzli mukofotga sazovor bo‘ladi. Afsuski, Chedvik o‘zining so‘nggi filmi “Ma Reyni: Blyuz onasi” filmini ko‘rmadi. Aktyor premyeradan uch oy oldin — 2020-yil avgustda vafot etdi.
2016-yilda Bouzmanga yo‘g‘on ichak saratoni tashxisi qo‘yilgan. Aktyor kasalligini hammadan yashirib, filmlarda rol o‘ynashni davom ettiradi. Chedvik 43 yoshida kasallik asoratlaridan vafot etdi.
Pol Uoker
“Forsaj” yulduzi 2013-yil noyabr oyida o‘z uyidan bir necha ko‘cha narida vafot etadi. Pol o‘sha kuni Filippindagi to‘fon qurbonlariga mablag‘ yig‘ish uchun uyushtirgan xayriya tariqasidagi avtoko‘rgazmada halokatga uchraydi.
Guvohlarning so‘zlariga ko‘ra, Pol qizil Porsche avtomobilining yo‘lovchi o‘rindig‘iga o‘tirgan. Rulda uning yaqin do‘sti bo‘lgan. Natijada do‘sti boshqaruvni yo‘qotib, mashina chiroq ustuni va daraxtga borib urilgan. Mashina bir zumda yonib ketgan. Haydovchi va yo‘lovchi voqea joyida halok bo‘lgan. Pol Uoker 40 yoshda edi.
Anton Yelchin
Aktyor bir marta Garri Potter roli uchun kasting topshiradi, ammo omad unga kulib boqmaydi. Ammo yosh aktyor mashhur “Doktor Xaff” teleserialida ishtirok uchun “Dunyoning eng ta’sirchan aktyori” mukofotiga sazovor bo‘ladi. Birinchi rolini Anton to‘qqiz yoshida o‘ynagan: uni “Odam asosan suvdan iborat” mustaqil filmiga taklif qilishgan.
Shuni ta’kidlash kerakki, u ajoyib aktyorlik qobiliyatiga ega edi. Ehtimol, aynan shu fazilati unga Gollivudni zabt etishda yordam bergandir. Natijada Anton taniqli rejissorlar bilan hamkorlik qila boshlaydi. “Yulduzli yo‘l” va “Terminator” blokbasterlarida ishtirok etish Yelchinga shuhrat va mashhurlik olib keladi.
Aktyorning ijodiy karyerasi ayni cho‘qqisiga chiqqanda to‘xtab qoladi. Anton noodatiy baxtsiz hodisadan vafot etadi: shunchaki qo‘l tormoziga qo‘yilmagan mashinasi uni bosib ketadi. Endigina 27 yosh kirgan aktyor 2016-yil 19-iyunda vafot etadi.
Kurt Kobeyn
O‘tgan asrning eng sirli va ekstravagant musiqachilaridan biri 1967-yil 20-fevralda Aberdinda (Vashington) uy bekasi va avtomexanik oilasida tug‘ilgan.
Agar buvisi bo‘lmaganida uning taqdiri umuman boshqacha bo‘lardi. Ota-onasi ajrashgandan so‘ng, Kurt g‘amgin va befarq bo‘lib qoladi. Ammo buvisi nabirasida ajoyib musiqiy qobiliyatlarni ko‘radi va uni rivojlantirishga yordam beradi. Bundan tashqari, Kurt chiroyli rasm chizgan.
Kobeyn olamshumul shon-shuhratga jasurligi va mehnati bilan erishadi. Qiyin xarakteriga, doim yolg‘iz qolish istagiga qaramay, u yaratgan “Nirvana” guruhi qisqa vaqt ichida Kobeynni yoshlar kumiriga aylantiradi. Noodatiy musiqa va qo‘shiqlar Kurt iste’dodining millionlab muxlislarini o‘ziga jalb qiladi.
Ammo Kobeyn mashhurlikni yoqtirmasdi, u o‘zini doim hammaning e’tiboridan chetda his qilar edi. Shuningdek, musiqachi do‘kondan olingan go‘sht bo‘laklarini quroldan otish uchun o‘rmonga tez-tez borib turgan. Shu tariqa u ruhiy noqulaylikdan qutulgan.
Ajablanarlisi shundaki, Kurt bir necha million dollarlik boyligi bo‘lsa-da, juda oddiy yashagan. Uning murakkab va qarama-qarshi hayotidagi yagona tasallisi — qizi Frensis edi. Mashhur musiqachi 1994-yil 5-aprelda 27 yoshida sirli tarzda vafot etadi.
Politsiya musiqachining o‘z joniga qasd qilganini da’vo qiladi. Ammo ba’zi ekspertlar bu versiyaga shubha qilishgan va hatto Kobeynning o‘limida uning shov-shuvli harakatlari bilan tanilgan rafiqasi Kortni Lavni gumon qilishgan.
Kris Farli
U bosh rolni o‘ynagan Dennis Duganning “Beverli-hillzlik ninzya” filmi olamshumul shuhrat keltiradi. Ko‘pchilikning tan olishicha, Gollivudda Kris Farlidan ko‘ra kulgili komediyachi bo‘lmagan. Albatta, u ko‘p sonli rollari bilan maqtana olmaydi. Ammo uning ekrandagi har bir roli tomoshabinlar xotirasida qoldi.
Real hayotda Kris mehribon ota bo‘lib, ikki farzandni tarbiyalaydi. Ko‘pgina Gollivud yulduzlari Krisning ajoyib karyeraga ega bo‘lishiga shubha qilishmagan. Biroq aktyorning o‘zi barcha umidlarni chipakka chiqaradi. Spirtli ichimliklar, noqonuniy giyohvand moddalar va semizlik Farli kurashmoqchi bo‘lgan, oxir-oqibatda o‘limiga sababchi bo‘lgan asosiy muammolardir. U 1997-yil 18-dekabrda 33 yoshli aktyorning giyohvand moddalarning yuqori dozasidan yuragi to‘xtab qoladi. O‘limidan so‘ng aktyor Gollivud Shon-sharaf xiyobonida o‘z yulduziga ega bo‘ldi.
Kori Xeym
Rejissor Joel Shumaxer tomonidan suratga olingan “Yo‘qolgan bolalar” filmi aktyor ijodiy faoliyatining kultiga aylandi. Ushbu o‘smir obrazi Korini o‘tgan asrning 80-yillarida amerikalik yoshlarning kumiriga aylantirdi. Xeym ko‘chada paydo bo‘lganda, minglab muxlislar uni o‘rab olishardi. Aftidan, Koriga omad kulib boqqandi va uni hech qachon qo‘yib yubormasdi.
Ammo u taniqli hamkasblari — Gollivud yulduzlari tomonidan e’tirof etilgan aktyorlik iste’dodini rivojlantira olmadi. Korining giyohvand moddalarga bo‘lgan ishtiyoqi karyerasiga nuqta qo‘ydi, oddiyroq qilib aytganda, hammasini yo‘q qildi. Xeym bir necha marta urinsa ham bu odatidan qutula olmadi.
Tan olish kerakki, o‘sha paytga kelib uning ijodiy karyerasi pasayib ketgan, sobiq yoshlik kumiri unutilgan edi. Ehtimol, ishidagi muvaffaqiyatsizliklar, hayotidagi ko‘ngilsizliklar aktyor hayotida fojiali rol o‘ynagan. U 2010-yil 10-martda dozani oshirib yuborish oqibatida vafot etadi, o‘shanda aktyor 38 yoshda edi.
Mavzuga doir:
Kino olamida katta iz qoldirgan, ammo fojiali tarzda vafot etgan “Garri Potter” yulduzlari (foto)
Iste’dodli va yosh: suratga tushgan so‘nggi filmlarini ko‘rish nasib etmagan aktyorlar
Birgina omadsiz roli tufayli tomoshabinlar nazaridan qolgan Gollivud aktyorlari (foto)
Izoh (0)