Sudyalar oliy kengashi va joylardagi sudyalar Malaka hayʼati huzurida jamoatchilik asosida faoliyat yurituvchi Sudyalar odobi komissiyalari tashkil etilgan. Sudyalar oliy kengashi raisining matbuot kotibi Tursunali Akbarovning “Daryo”ga bergan izohiga ko‘ra, komissiya OAV va ijtimoiy tarmoqlarda eʼlon qilingan materiallardagi sudyalarning xatti-harakatlariga oid masalalarni o‘rganib chiqadi.
“Bundan tashqari, Komissiya jismoniy va yuridik shaxslar tomonidan berilgan Sudyalar odobi kodeksining axloq va maʼnaviyatga oid xos qoidalari buzilganligi oid murojaatlarni ham o‘rganadi va tegishli xulosa beradi.
Sudyalar odobi kodeksida sudya nafaqat kasbiy faoliyatini amalga oshirishi jarayonida, balki xizmatdan tashqari vaqtda ham rioya etishi lozim bo‘lgan qoidalari ham yetarli. Ular ommaviy va ko‘ngilochar tadbirlarda ishtirokidan tortib, boshqalar bilan munosabati, muomalasi, kiyinishi, hatto shaxsiy hayot chegarasidan chiqmagan holda turmush tarzigacha bo‘lgan obod-axloq meʼyorlaridan iborat. Ushbu talablar buzilganligi ehtimoliga aniqlik kiritish, o‘rni kelganda o‘zgacharoq yondashuv, tor doirada muhokama zaruriyatini yuzaga keltirishi mumkin. Sudyalar odob komissiyalari shuning uchun ham kerakligini tajribalar ko‘rsatdi”, dedi Sudyalar oliy kengashi raisining matbuot kotibi.
Masʼulning alohida taʼkidlashicha, Komissiyalar ishiga viloyat sudi raisi va o‘rinbosarlari taʼsir o‘tkazolmaydi.
Bunday imkoniyat yo‘q darajada. Chunki, xolislikni taʼminlash va aralashuvlar ehtimollari oldini olish uchun shunday tartib joriy etilganki, unga ko‘ra, barcha darajadagi sudlar raisi va o‘rinbosarlari Sudyalar odob komissiyasi aʼzoligiga saylanishi mumkin emas. Mazkur talab joylardagi sudlar Malaka hayʼatining nainki raislari, balki aʼzolariga ham taalluqli.
Ikkinchidan, deylik, viloyat va unga tenglashtirilgan sudlar rahbarlarining (jumladan, Oliy sud aʼzolarining ham) Sudyalar odobi kodeksi qoidalarini buzganiga doir masalalar joylardagi Odob komissiyalarida emas, aksincha, Sudyalar oliy kengashi huzuridagi shunday tuzilma tomonidan ko‘rib chiqiladi, dedi Tursunali Akbarov.
Qo‘shimcha qilinishicha, Komissiya xulosasi sudyaga nisbatan xizmat tekshiruvi o‘tkazishga (yoki aksincha) asos bo‘ladi.
Daryo eslatadi: Jazolangan sudyalar
Jinoyat ishlari bo‘yicha Denov tuman sudi raisi yo‘l-transport hodisasiga uchragan, oqibatda u bilan bitta avtomashinada bo‘lgan advokat halok bo‘lib, o‘zi esa u turli darajada tan jarohati olgandi. Unga sud hukmi bilan 5 yil muddatga ozodlikdan mahrum qilish jazosi tayinlangan.
Ohangaron tumani sudida manzil koloniyada jazo muddatlarini o‘tayotgan 14 nafar shaxsning ishini ko‘rib chiqish vaqtida sudya mantiyasiz, bayonnoma yuritmasdan ish ko‘rgani uchun mazkur tuman sudining raisi va sudyasiga nisbatan ogohlantirish intizomiy jazo chorasi qo‘llanilgan.
Oqqo‘rg‘on tumani sudi raisi sud hukmi yozilishida eʼtiborsizlikka yo‘l qo‘ygani uchun maoshining 20 foizi miqdorida jarima intizomiy jazoga tortilgan.
Yakkabog‘ tumanida sudyaning xatosi sabab erkak nogironlik nafaqasini ololmay qolgani uchun sudyaga nisbatan intizomiy ish qo‘zg‘atilib, tegishli intizomiy jazo qo‘llanilgan.
Quva tuman sudi raisi o‘zi ko‘rib chiqqan, biroq hali qonuniy kuchga kirmagan jinoyat ishi bo‘yicha markaziy telekanallardan biriga intervyu bergani uchun intizomiy jazo olgan.
Toshkent shahridagi kafelarning biridan mast holda chiqqan va mashina o‘g‘irlashda gumonlangan sudyaning vakolati muddatidan avval tugatilib, unga nisbatan jinoiy ish ochilgan.
Izoh (0)