Toshkentda mashina kapotini “akvarium”ga aylantirgan fuqaro 1 million 125 ming so‘m jarimaga tortildi.
Fuqaro avtomobil kapotiga himoya plyonkasini yopishtirgani hamda uning ichiga suv to‘ldirib, baliqlarni solgani aks etgan video tarqalib, ijtimoiy tarmoq foydalanuvchilari orasida e’tirozlarga sabab bo‘lgandi.
Ekologiya, atrof-muhitni muhofaza qilish va iqlim o‘zgarishi vazirligi matbuot xizmati ushbu huquqbuzarlik Toshkent shahrida fuqaro I.N. tomonidan sodir etilganini ma’lum qildi. Unga Ma’muriy javobgarlik to‘g‘risidagi kodeksning 111-moddasi 1-qismi (hayvonlarga nisbatan shafqatsiz munosabatda bo‘lish) bilan ma’muriy bayonnoma rasmiylashtirilgan va BHMning 3 baravari — 1 million 125 ming so‘m miqdorida jarima belgilangan.
Kodeksda hayvonlarga nisbatan shafqatsiz munosabatda bo‘lish, ya’ni ularni g‘arazli yoki boshqa past niyatlarda qiynoqqa solish yoki ularga azob berish BHMning 3 baravaridan 5 baravarigacha miqdorda jarima solishga sabab bo‘lishi belgilangan.
Trend uchun avtomobil kapotida raqsga tushganlar ham javobgarlikka tortildi. Toshkent shahri va viloyatida bunday harakatlarni sodir etganlarga ma’muriy bayonnomalar rasmiylashtirildi.
Izoh (0)