AQSH prezidenti Donald Tramp 13-iyul kuni Ukrainaga Patriot havo hujumidan mudofaa raketalarini yuborishini maʼlum qildi. Bu haqda Al Jazeera xabar berdi.
Tramp Rossiya prezidenti Vladimir Putin urushni to‘xtatish bo‘yicha muzokaralardan bosh tortganidan “hafsalasi pir bo‘lgani”ni aytgan.
Biz Ukrainaga Patriotʼlar yuboramiz, ular bunga juda muhtoj. Putin juda ko‘pchilikni hayratda qoldiradi. U odatda yaxshi gapiradi, keyin esa kechqurun hamma yoqni bombardimon qiladi. Demak, muammo bor. Bu menga yoqmayapti. Biz Kiyevga turli xil va juda murakkab harbiy texnikalarni jo‘natishni rejalashtirdik. Ular buning uchun 100 foiz haq to‘lamoqchi va biz shuni xohlaymiz”, degan Tramp.
Ukrainaga yuboriladigan Patriot raketalarining soni haqida bir qarorga kelinmagan. O‘tgan hafta Tramp maʼmuriyati NATOga Kiyevga yuborish uchun qurol sotishini maʼlum qilgandi.
AQSH prezidenti shu hafta NATO bosh kotibi Mark Ryutte bilan uchrashib, Kiyevga qurol yetkazib berish rejalarini muhokama qilishi kutilmoqda. U bugun, 14-iyul kuni Rossiya bo‘yicha “katta bayonot” berishini taʼkidlagan.
Putin janglarda qisqa tanaffuslarga rozi bo‘lgan bo‘lsa-da, AQSHning shartsiz 30 kunlik o‘t ochishni to‘xtatish bo‘yicha takliflarini rad etgan. Rossiya bu taklif Kiyevga o‘z qo‘shinlarini safarbar qilish va qayta qurollanish imkoniyatini berishini bildirgan.
Moskva va Kiyev o‘rtasida tinchlik o‘rnatish bo‘yicha bir necha oylik muvaffaqiyatsiz urinishlardan so‘ng, Tramp 7-iyul kuni Ukrainaga asosan “mudofaa qurollari”dan iborat yuklarni jo‘natishni eʼlon qildi. AQSH prezidenti Moskvaga sanksiya kiritish borasida maʼlumot bermadi. Biroq u Putindan hafsalasi pir bo‘lganini yana takrorlagan.
Tramp yanvar oyida Oq uyga qaytganidan so‘ng, Kiyevni qo‘llab-quvvatlashni cheklagan edi. Ukraina AQSHning sobiq prezidenti Jo Bayden davrida ajratilgan mablag‘lar hisobidan qurol-yarog‘ bilan taʼminlanib turgan.
Izoh (0)