АҚШ президенти Дональд Трамп 13 июль куни Украинага Patriot ҳаво ҳужумидан мудофаа ракеталарини юборишини маълум қилди. Бу ҳақда Al Jazeera хабар берди.
Трамп Россия президенти Владимир Путин урушни тўхтатиш бўйича музокаралардан бош тортганидан “ҳафсаласи пир бўлгани”ни айтган.
Биз Украинага Patriotʼлар юборамиз, улар бунга жуда муҳтож. Путин жуда кўпчиликни ҳайратда қолдиради. У одатда яхши гапиради, кейин эса кечқурун ҳамма ёқни бомбардимон қилади. Демак, муаммо бор. Бу менга ёқмаяпти. Биз Киевга турли хил ва жуда мураккаб ҳарбий техникаларни жўнатишни режалаштирдик. Улар бунинг учун 100 фоиз ҳақ тўламоқчи ва биз шуни хоҳлаймиз”, деган Трамп.
Украинага юбориладиган Patriot ракеталарининг сони ҳақида бир қарорга келинмаган. Ўтган ҳафта Трамп маъмурияти НАТОга Киевга юбориш учун қурол сотишини маълум қилганди.
АҚШ президенти шу ҳафта НАТО бош котиби Марк Рютте билан учрашиб, Киевга қурол етказиб бериш режаларини муҳокама қилиши кутилмоқда. У бугун, 14 июль куни Россия бўйича “катта баёнот” беришини таъкидлаган.
Путин жангларда қисқа танаффусларга рози бўлган бўлса-да, АҚШнинг шартсиз 30 кунлик ўт очишни тўхтатиш бўйича таклифларини рад этган. Россия бу таклиф Киевга ўз қўшинларини сафарбар қилиш ва қайта қуролланиш имкониятини беришини билдирган.
Москва ва Киев ўртасида тинчлик ўрнатиш бўйича бир неча ойлик муваффақиятсиз уринишлардан сўнг, Трамп 7 июль куни Украинага асосан “мудофаа қуроллари”дан иборат юкларни жўнатишни эълон қилди. АҚШ президенти Москвага санкция киритиш борасида маълумот бермади. Бироқ у Путиндан ҳафсаласи пир бўлганини яна такрорлаган.
Трамп январь ойида Оқ уйга қайтганидан сўнг, Киевни қўллаб-қувватлашни чеклаган эди. Украина АҚШнинг собиқ президенти Жо Байден даврида ажратилган маблағлар ҳисобидан қурол-яроғ билан таъминланиб турган.
Изоҳ (0)