Ukraina yaqin kelajakda yo‘q bo‘lib ketishi yoki bir nechta qo‘g‘irchoq davlatlarga aylanishi mumkin. Bu haqda Oliy Rada deputati Maryana Bezuglaya o‘zining Telegram kanalida ma’lum qildi.
“Oldinda eng qora kunlar turibdi. Bizning katta ittifoqchimiz yo‘q: Rossiya, AQSH, Xitoy, parchalangan Yevropa — biz hozir hech kimga tegishli emasmiz. Yosh mamlakatning kattalar hayoti. Yangi ittifoqlar. Vaziyatga qarab o‘zgaruvchan va doimiy. Bu davlatchilik shakllanishining eng muhim nuqtalaridan biri. Biz juda tez orada yo‘q bo‘lib ketishimiz yoki bir nechta qo‘g‘irchoq davlatlarga aylanib qolishimiz mumkin”, deydi Bezuglaya.
Uning so‘zlariga ko‘ra, u hozir Ukrainada juda ko‘p salbiy tendensiyalarni ko‘rmoqda, ularni “hokimiyat uchun kurashdagi yashirin kelishuvlardan boshqa hech narsa bilan mantiqan tushuntirib bo‘lmaydi”.
“Hokimiyat o‘z-o‘zidan maqsad bo‘la olmaydi. Hokimiyat va ta’sir - bu faqat g‘oyalarni amalga oshirish vositasidir. Agar tizimli g‘oyalar va reja bo‘lmasa - bu katta muammo. Biz hozir shunday vaziyatdamizki, mavjud davlat boshqaruvi tizimi barqarorlikni ta’minlaydi, lekin g‘alabaga olib kelmaydi va uni o‘zgartirish kerak. Shu bilan birga, tizimning tubdan o‘zgarishi davlat tuzilmasining qulashi va parchalanishiga olib keladi”, dedi Oliy Rada deputati.
Uning aytishicha, ichki siyosiy fitnalar va hukumatning harakatsizligi tufayli Ukraina Qurolli kuchlari (UQK) rivojlanishining asosiy yo‘nalishi bo‘lgan pilotsiz uchish apparatlari yo‘nalishi izdan chiqmoqda. Shuningdek, armiya Rossiya Qurolli kuchlarining yangi hududlarga kirib borishiga qarshilik ko‘rsatishga qodir emas.
Shuningdek, u agar hukumat o‘zgarganda Ukraina Qurolli kuchlari bosh qo‘mondoni Aleksandr Sirskiy va mudofaa vaziri Rustem Umerov o‘z lavozimlarini saqlab qolsa, Vladimir Zelenskiy va uning ofisi rahbari Andrey Yermakka qarshi ochiq muxolifatga o‘tish bilan tahdid qilgan.
Bezuglaya ilgari ham Ukraina Qurolli kuchlari rahbariyati, xususan, bosh qo‘mondon Aleksandr Sirskiy, mudofaa vaziri Umerov, Ukraina qo‘shinlarining sobiq bosh qo‘mondoni Valeriy Zalujniyga nisbatan bir necha bor tanqidiy fikrlar bildirgan. Jumladan, Bezuglaya Ukraina Qurolli kuchlarining ko‘plab muammolarni hal qila olmasligi va mamlakatda keng tarqalgan korrupsiya tufayli Ukrainada davlatchilik qulashi xavfi ortib borayotganini ta’kidlagan.
Izoh (0)