Pokiston hukumati AQSH prezidenti Donald Trampni Hindiston bilan nizoni hal etishdagi vositachiligi uchun 2026-yilgi tinchlik bo‘yicha Nobel mukofotiga nomzod etib ko‘rsatdi. Bu haqda Pokiston hukumatining X ijtimoiy tarmog‘idagi rasmiy sahifasida ma’lum qilingan.
Islomobodning fikricha, aynan Amerika rahbarining harakatlari vaziyatning keskinlashuvini to‘xtatishga yordam berdi va uni barqarorlashtirishda hal qiluvchi rol o‘ynagan.
“Pokiston hukumati prezident Donald Trampni yaqinda bo‘lib o‘tgan Hindiston—Pokiston inqirozi paytidagi qat’iyatli diplomatik aralashuvi va yetakchiligini e’tirof etgan holda 2026-yilgi tinchlik bo‘yicha Nobel mukofotiga rasman tavsiya etishga qaror qildi”, deyiladi xabarda.
Shuningdek, Pokiston hukumati AQSH prezidenti bir vaqtning o‘zida ham Islomobod, ham Nyu Dehli bilan diplomatik yo‘l orqali muloqot qilib, “katta strategik uzoqni ko‘ra bilish va ajoyib davlat donoligini namoyish etganini” ta’kidlagan.
7-mayga o‘tar kechasi Hindiston armiyasi “Pokistondagi terrorchilik infratuzilmasiga qarshi” “Sindur” operatsiyasini boshlaganini e’lon qildi. Hindiston va Pokiston o‘rtasidagi mojaroning keskin tus olishidan oldin Jammu va Kashmir ittifoqdosh hududidagi Anantnag tog‘li tumanida joylashgan Paxalgamda terakt sodir bo‘lgan edi. Ushbu hudud Britaniya Hindistoni bo‘linganidan beri Nyu Dehli nazorati ostida, ammo Pokiston ham unga da’vogarlik qilmoqda.
22-aprel kuni Hindistonda terrorchilik tashkiloti deb tan olingan “Qarshilik fronti”ga mansub qurollangan shaxslar u yerda 20 dan ortiq odamni otib o‘ldirgan. Nyu Dehli Islomobodning voqeaga aloqadorligini ma’lum qildi, Pokiston hukumati esa buni rad etdi.
Bu Trampning ushbu nufuzli mukofotga nomzod sifatida ko‘rsatilishi birinchi marta emas. Xususan, 2021-yilda Oq uy rahbari so‘nggi 30 yil ichida yangi urushlarni boshlamagan birinchi AQSH prezidenti sifatida nomzodlar qatoriga kiritilgan edi.
Donald Trampning o‘zi avvalroq tinchlik bo‘yicha Nobel mukofotiga loyiq ekanini, biroq uni hech qachon ololmasligini aytgan edi.
Izoh (0)