Rossiya Mudofaa vazirligi 25 yoshgacha bo‘lgan rossiyalik harbiy xizmatchilarning birinchi guruhi Istanbuldagi kelishuvlarga muvofiq Rossiyaga qaytarilganini ma’lum qildi. Bu haqda BBC xabar berdi.
Almashtirilganlar soniga aniqlik kiritilmagan. Ukraina prezidenti Vladimir Zelenskiy ikkinchi yirik almashinuv boshlanganini tasdiqlagan. Uning so‘zlariga ko‘ra, almashinuv bir necha bosqichda bo‘lib o‘tishi rejalashtirilgan.
“Rossiyalik harbiy xizmatchilarning 25 yoshgacha bo‘lgan birinchi guruhi qaytarildi. Buning evaziga Ukraina Qurolli kuchlarining xuddi shuncha miqdordagi harbiy asirlari almashildi” deyiladi Rossiya Mudofaa vazirligi bayonotida.
“Bugun almashinuv boshlandi. Yaqin kunlarda bir necha bosqichda davom etamiz. Hozirda qaytarilayotganlar toifasiga yaradorlar va og‘ir yaradorlar, shuningdek, 25 yoshgacha bo‘lganlar kiradi. Jarayon ancha murakkab, nozik detallar ko‘p, muzokaralar deyarli har kuni davom etmoqda. Barchani ortga qaytarish uchun qo‘limizdan kelganini qilmoqdamiz”, dedi Zelenskiy.
So‘nggi marta 23—25-may kunlari Rossiya va Ukraina o‘rtasida asirlar almashinuvi amalga oshirilgan. Birinchi kuni tomonlarning har biri 270 nafar harbiy va 120 nafar fuqaroni, ikkinchi kuni 307 nafar harbiy xizmatchini, uchinchi kuni esa 303 nafar harbiy xizmatchini topshirgan. Ushbu almashinuv 2022-yilda jangovar harakatlar boshlanganidan beri eng yirik almashinuv bo‘lgan.
Izoh (0)