O‘zbekistonning Isroildagi elchixonasi ushbu mamlakatni tark etish istagida bo‘lgan o‘zbekistonliklar qanday yo‘l bilan chiqib ketishi mumkinligi haqida ma’lumot berdi.
Unga ko‘ra, hozirgi xavfsizlik vaziyati munosabati bilan Isroilni mustaqil ravishda tark etish istagida bo‘lgan O‘zbekiston fuqarolari quyidagi nazorat-o‘tkazish punktlari orqali chiqib ketishi mumkin:
- “Menaxem Begin” / “Taba” — Isroil—Misr chegarasida joylashgan (Isroilning Eylat va Misrning Taba shaharlari o‘rtasida);
- “Shayx Husayn” — Isroil—Iordaniya shimoliy chegarasida joylashgan (Isroilning Bayt Shean va Iordaniyaning Irbit shaharlari o‘rtasida);
- “Isxak Rabin” / “Vadi Arava” — Isroil—Iordaniya janubiy chegarasida joylashgan (Isroilning Eylat va Iordaniyaning Akaba shaharlari o‘rtasida).
Qayd etilishicha, yuqoridagi chegara punktlari hozirda odatiy tartibda (24 soat) faoliyat ko‘rsatmoqda.
Misr orqali
O‘zbekiston fuqarolari “Menaxem Begin” / “Taba” nazorat-o‘tkazish punktini kesib o‘tib, Misrga vizasiz (“Sinay kirish muhri” orqali) kira oladi. “Sinay kirish muhri” 14 kungacha faqat Sinay yarimoroli hududida bo‘lish huquqini beradi (Qohira va boshqa shaharlarga safar qilish mumkin emas). 21 yoshga to‘lmagan fuqarolarga ota yoki onalaridan biri hamrohlik qilishi shart. “Taba”dan Sharm ash-Shayxgacha (270 km) avtobus yoki avtomobillarda harakatlanish imkoniyati bor.
Aviaqatnovlar (Sharm ash-Shayx aeroportidan):
- Uzbekistan Airways: haftasiga 3 marta (seshanba, chorshanba, shanba, soat 12:35) Toshkentga.
- Turkish Airlines: Har kuni 1 yoki 2 marta Istanbulga (Istanbul xalqaro aeroportiga) (Toshkentga tranzit).
- Pegasus Airlines: Har kuni 1 yoki 2 marta Istanbulga (“Sabixa Gyokchen” aeroportiga) (Toshkentga tranzit).
Iordaniya orqali
“Shayx Husayn” (Bayt Shean shahri) yoki “Isxak Rabin” / “Vadi Arava” nazorat-o‘tkazish punktlari orqali Iordaniya poytaxtigacha borib, keyin quyidagi aviayo‘nalishlardan foydalanish mumkin:
- Ummon—Istanbul—Toshkent;
- Ummon—Dubay—Toshkent.
Elchixonaning bildirishicha, Iordaniyaga kirish uchun mamlakat IIV sayti orqali viza olish zarur:
- https://www.moi.gov.jo
- https://moi.gov.jo/EN/Pages/Visa_E_Applications
- https://www.eservices.moi.gov.jo.
Zarur hollarda O‘zbekiston elchixonalarining favqulodda telefon raqamlariga murojaat qilishi mumkin:
- Misrda (+202 333-617-23; +20 128 666-1441, eg.uzembassy@mfa.uz);
- Saudiya Arabistonida, o‘rindoshlik asosida Iordaniyada (+966 11 263-5223, +966 56 721-7731, uzbembriyadh@gmail.com);
- Isroilda (+972 (3) 672-2466, 672-2371, 758-5075, 758-5076, (54) 485-1397, il.uzembassy@mfa.uz).
“Isroil hududini tark etayotganda shaxsiy xavfsizlik ehtiyot choralarini ko‘rishni va Frontorti buyrug‘i tomonidan berilgan ko‘rsatmalarga qat’iy amal qilishni so‘raymiz”, deyiladi elchixona xabarida.
Elchixona bundan avval mamlakatda murakkab vaziyat vujudga kelayotganligini eʼtiborga olib o‘zbekistonliklarga shaxsiy xavfsizlik choralarini ko‘rish va raketa otishmalari paytida boshpanalarni tark etmaslikni tavsiya etgandi.
Isroil hukumati Eron bilan keskinlik ortgani sababli fuqarolariga mamlakatdan chiqishni taqiqladi. AQSHning Isroildagi elchixonasi amerikaliklarga mamlakatni tark etishda yordam ko‘rsata olmasligini ma’lum qildi. Isroil havo hududining vaqtincha yopilgani munosabati bilan ushbu mamlakat bilan aviaqatnovlar to‘xtatilgan.
Izoh (0)