Qozog‘iston Prezidenti Qosim-Jo‘mart To‘qayev Turkiy davlatlar tashkiloti (TDT) davlat rahbarlarining keyingi norasmiy uchrashuvini Ostonada o‘tkazishni taklif qildi. Bu haqda u TurkPA a’zo davlatlari parlament rahbarlari bilan uchrashuvda ma’lum qildi.
“Yaqinda Vengriyada bo‘lib o‘tgan davlat rahbarlarining norasmiy uchrashuvi samarali bo‘ldi. Qozog‘iston bu ijobiy yo‘nalishni davom ettirishdan doimo manfaatdor. Shu munosabat bilan men keyingi sammitni Turkistonda o‘tkazishni taklif etdim”, dedi prezident.
To‘qayev Qozog‘iston Parlament assambleyasi tashabbuslarini qo‘llab-quvvatlashini va turkiy integratsiyaga o‘z hissasini qo‘shishga tayyor ekanini bildirgan.
“Qozog‘iston Turkiy davlatlar tashkilotining asoschilari qatorida. Bizning fikrimizcha, bu tuzilma mamlakatlarimizning iqtisodiy, madaniy va insonparvarlik rivojlanishiga alohida ta’sir ko‘rsatadi. Uning salohiyati xalqlarimizning umumiy maqsadlariga erishish yo‘lida qo‘llanilishi lozim”, deya ta’kidlagan Qozog‘iston prezidenti.
Uning so‘zlariga ko‘ra, Qozog‘iston Turkiy davlatlar tashkiloti sammitlari natijalarini yuqori baholaydi va erishilgan kelishuvlarni sifatli amalga oshirishga katta e’tibor qaratadi.
“Turkiy alifboning yagona variantini tasdiqlashni tarixiy voqea deyish mumkin”, deya qo‘shimcha qilgan Qosim-Jo‘mart To‘qayev.
21-may kuni Vengriyada Turkiy davlatlar tashkiloti norasmiy sammiti o‘tkazildi. Unda O‘zbekiston prezidenti Shavkat Mirziyoyev ham ishtirok etdi.
Izoh (0)