Saida Mirziyoyeva Moody’s xalqaro reyting agentligi O‘zbekistonning suveren kredit reytingi bo‘yicha prognozini “barqaror”dan “ijobiy”ga o‘zgartirganidan xursand ekanini bildirdi.
Uning ta’kidlanishicha, prognozning yaxshilanishi 2030-yilga borib O‘zbekistonning kredit reytingini ishonchli investitsion darajaga ko‘tarish bo‘yicha qo‘yilgan maqsad sari birinchi qadam.
“Bu prezidentimiz tomonidan olib borilayotgan islohotlar dasturiga berilgan ijobiy baho, shuningdek, tanlangan yo‘l to‘g‘riligining tasdig‘i bo‘ldi.
Bugungi kunda O‘zbekiston xorijiy investorlar tomonidan global beqarorlik sharoitida ham barqaror o‘sishga qodirligini namoyon etayotgan ishonchli hamkor sifatida qabul qilinmoqda. Bu sa’y-harakatlarning barchasi IV Toshkent xalqaro investitsiya forumining muvaffaqiyatli o‘tkazilganida o‘z aksini topdi.
Prognozning yaxshilanishi 2030-yilga borib O‘zbekistonning kredit reytingini ishonchli investitsion darajaga ko‘tarish bo‘yicha qo‘yilgan maqsad sari birinchi qadamdir.
Shu bilan birga, ko‘zlangan maqsadga faqat umumiy sa’y-harakatlar bilangina, iqtisodiyotimizning raqobatbardoshligini oshirish va makroiqtisodiy barqarorlikni saqlab qolish orqali erishish mumkinligini anglash muhim”, deydi prezident yordamchisi.
Moody’s xalqaro reyting agentligi tomonidan 13-iyun kuni O‘zbekiston suveren kredit reytingiga bag‘ishlangan navbatdagi hisobot e‘lon qilindi.
Unga ko‘ra, respublikaning kredit reyting bahosi “Ba3” (“BB-”) darajasida tasdiqlanib, reyting kutilmasi “barqaror”dan “ijobiy”ga oshirildi.
Moody’s tomonidan 2025-yilning boshidan beri 11 ta mamlakatning suveren kredit reytingi bahosi yoki kutilmasi pasaytirilgan hamda 12 ta mamlakatniki oshirilgan. Hisobotda O‘zbekiston suveren kredit reytingi kutilmasining “ijobiy”ga oshirilishi amalga oshirilayotgan institutsional islohotlar orqali iqtisodiy siyosat samaradorligi va institutlar sifati yaxshilanishi bilan bog‘liq ekanligi ta’kidlangan.
Izoh (0)