Qozog‘istonda kartoshka narxlari oshib ketganiga milliy iqtisodiyot vaziri Serik Jumangarin munosabat bildirdi. Bu haqda Tengrinews xabar berdi.
Vazir narxlarning oshishini uchta davlatda hosil yaxshi bo‘lmagani sababli sabzavotlar eksport qilingani bilan bog‘ladi.
Talab va taklif qonuni mavjud. Belarusda ham, Rossiyada ham, O‘zbekistonda ham kartoshka hosili yaxshi bo‘lmagani sababli, kartoshka bilan shunday holat yuzaga keldi. Qozog‘istonda yetarli darajada katta zaxiralar bor edi, biz o‘tgan yili ularni shakllantirgan edik. Biroq fermerlar ham daromad ko‘rishi kerak edi, shu bois ma’lum vaqt davomida kartoshka eksportiga to‘sqinlik qilmadik. Bizda kartoshka taqchilligi yo‘q, lekin narx ko‘tarildi, dedi Serik Jumangarin.
Vazir hukumatning ikki yo‘li borligini ma’lum qildi. Birinchisi — kartoshka narxini cheklash, shunda “bu yil uni hech kim ekmaydi va kelasi yili aniq taqchillik kuzatiladi”. Ikkinchi yo‘l — kartoshka eksportini cheklash, amalda shunday qilindi ham.
Ammo biz narxlarni cheklamadik. Chunki bu bozor tamoyillariga zid bo‘lgan choralar bo‘lardi. Hozir kartoshka 400-600 tenge (salkam 10-15 ming so‘m) atrofida turibdi. Turkistonda yangi kartoshka paydo bo‘ldi, uning narxi 200-300 tengedan (taxminan 5-7 ming so‘m) boshlanmoqda. O‘ylaymanki, hozir narx barqarorlashadi. Bizda do‘konlarda kartoshka bo‘lmagan biror holat kuzatilmadi. Masala narxda, lekin shunga yarasha talab ham bo‘ladi, dedi amaldor.
Qishloq xo‘jaligi vazirligi ta’kidlashicha, narxi 1300 tenge (32 ming so‘m) atrofida bo‘lgan yangi kartoshka Turkiston viloyatida plyonka ostida yetishtirilmoqda. Uning narxi yuqoriligiga yetishtirish texnologiyasi va “jozibador” ko‘rinishi sabab bo‘lmoqda.
2025-yilda Qozog‘iston atigi 15 ming tonna yuqori sifatli kartoshka yetishtirgan. Oddiy kartoshka 2,6 million tonnani tashkil etgan. Qozog‘istonda ikkinchi non taqchilligi yo‘q, deya qo‘shimcha qildi vazirlik.
Rossiya va Belarusda bu yil kartoshka yetishmovchiligi kuzatilmoqda. Belarus prezidenti Aleksandr Lukashenko rossiyaliklarni kartoshka tanqisligidan qutqarishni buyurgandi. U ikki mamlakatni boqishga yetarli miqdorda kartoshka yetishtirish vazifasini qo‘ygan. U bu yaxshigina daromad keltirishini ham aytgan.
Nima bo‘lganda ham, kartoshka yetishtirishni yaxshi bilamiz. Rus birodarlarga yordam berish kerak, degan Lukashenko.
Izoh (0)