Rossiya Mudofaa vazirligi 26-iyun kuni Donetsk viloyatidagi Shevchenkovo qishlog‘i qo‘lga olinganini ma’lum qildi. Bu ma’lumotni Ukraina harbiy idorasi bilan bog‘liq DeepState OSINT loyihasi xaritasi ham tasdiqladi. Fransiyaning LeFigaro gazetasining ta’kidlashicha, bu hududda 1982-yilda topilgan yirik litiy koni joylashgan.
Ukraina Milliy fanlar akademiyasi ma’lumotlariga ko‘ra, kon maydoni 40 gektarga yaqinni tashkil etadi. Unda 90 foizdan ortiq yuqori minerallashgan spodumen mavjud bo‘lib, ushbu mineraldan katta sarmoyalarsiz litiy ajratib olish mumkin.
Bundan tashqari, ushbu hududda tantal, niobiy, berilliy, seziy va rubidiy zaxiralari ham bor. Akkumulyator va elektronika xom ashyosiga bo‘lgan jahon talabining o‘sishi sharoitida Shevchenkovo koni strategik ahamiyatga ega hisoblanadi.
Bundan avval Rossiya armiyasi Zaporojye viloyatidagi Krutaya Balka koni ustidan nazorat o‘rnatgan edi. Shunday qilib hozirda Moskva Ukrainaning to‘rtta ma’lum litiy konidan ikkitasini nazorat qilmoqda. Qolgan ikkitasi - Dobra va Poloxovskoye — Kirovograd viloyatida joylashgan. Biroq u yerdagi petalitdan litiy ajratib olish qimmatroqqa tushadi.
Ukrainadagi litiyning umumiy zaxiralari 1991-yilgi baholashga ko‘ra, taxminan 500 ming tonnani tashkil etadi. Ammo urush boshlanguniga qadar konlarning birortasi ham sanoat miqyosida o‘zlashtirilmagan.
Aprel oyida Ukraina va AQSH foydali qazilmalarni birgalikda qazib olish uchun investitsiya jamg‘armasini tashkil etish to‘g‘risida bitim imzoladi. Hujjat Donald Tramp hokimiyatga kelganidan keyin, yanvar oyidan boshlab muhokama qilingan. Olingan daromadlarni mamlakatni tiklash va yangi loyihalarga yo‘naltirish rejalashtirilmoqda.
Iyun oyida Ukraina hukumati xususiy kompaniyalarga Dobra konini o‘zlashtirishga ruxsat berish jarayonini boshlashni ma’qulladi.
New York Times gazetasining yozishicha, ehtimoliy sarmoyadorlardan biri 81 yoshli milliarder Ronald Lauder bo‘lishi mumkin - u Trampning yaqin do‘sti va Jahon Yevropa kongressi rahbaridir.
Izoh (0)