Atom energiyasi bo‘yicha xalqaro agentlik (MAGATE) Erondagi obyektlarga hujumlar bo‘layotgan bir paytda jim turmasligi kerak. Buni BMT Xavfsizlik kengashi yig‘ilishida Eronning tashkilotdagi doimiy vakili Amir Said Iravoniy ma’lum qildi, deya xabar bermoqda Reuters.
“Eron Isroil tajovuzi to‘xtamaguncha o‘zini himoya qilish huquqidan foydalanishni davom ettiradi”, dedi u.
Uning so‘zlariga ko‘ra, Eron AQSH mojaroga aralashishi mumkinligi haqidagi xabarlardan tashvishda.
“Aniqlik kiritaylik: Eronning yadro dasturi tinch maqsadlarga yo‘naltirilgan va MAGATEning dunyodagi eng keng qamrovli tekshiruvlari ostida”, dedi Iravoniy.
Ushbu bayonotlardan so‘ng Isroilning BMTdagi vakili Dani Danon Iravoniyga murojaat qilib, Eron tomoni xalqaro hamjamiyatdan o‘zini himoya qilishni so‘ray olmasligini ta’kidladi.
Isroil 13-iyunga o‘tar kechasi Eronning yadro dasturiga qarshi “Isyonkor sher" operatsiyasini boshladi. Bir sutkadan kam vaqt o‘tgach, Islom Respublikasi javob hujumini amalga oshirdi. Keyingi kunlarda Isroil va Eron o‘zaro zarba berishni davom ettirdi. Ikkala tomon ham ushbu hujumlar natijasida halok bo‘lganlar va jabrlanganlar borligini ma’lum qildi, o‘z hududlaridagi bir qator obyektlarga zarba yetkazilganini tan oldi, ammo yetkazilgan zarar cheklangan ekanini ta’kidladi.
Izoh (0)