Erondagi hozirgi inqirozga barham berish uchun faqat bitta haqiqiy yechim mavjud bo‘lib, u ham bo‘lsa hozirgi rejimni ag‘darishda Eron xalqini qo‘llab-quvvatlash. Bu haqda Eronning so‘nggi valiahd shahzodasi Rizo Pahlaviy o‘zining X ijtimoiy tarmog‘idagi sahifasida ma’lum qildi.
Uning aytishicha, Islom Respublikasi Eron millati boyliklarini talon-toroj qilib, o‘zining maxfiy hamda xatarli yadro loyihalariga yuz milliardlab dollar sarflagan.
“Islom Respublikasi Eron millati boyliklarini talon-taroj qilib, xalqning farovonligi, xavfsizligi va turmush darajasini ta’minlash o‘rniga, uranni boyitish va o‘zining maxfiy hamda xatarli yadro loyihalariga yuz milliardlab dollar sarfladi. Oqibatda aziz Eronimizni urush arafasiga olib keldi. Bu tuzum uzoq vaqt dunyoni aldashga urindi, ammo endi uning asl mohiyati va qiyofasi barchaga ayon bo‘ldi. Islom Respublikasini javobgarlikka tortish vaqti yetdi”, deydi valiahd shahzoda.
Pahlaviyning ta’kidlashicha, Eron Pahlaviylar davrida Yadro qurolini tarqatmaslik shartnomasini imzolagan davlatlardan biri bo‘lgan.
“Eron Pahlaviylar davrida Yadro qurolini tarqatmaslik shartnomasi (YQTSH)ni imzolagan dastlabki davlatlardan biri edi. Biroq bugun Xalqaro atom energiyasi agentligi Islom Respublikasi shartnomani buzayotganini e’lon qildi. Ushbu hujjatlashtirilgan fosh etishga javoban, Xomanaiy va uning jinoyatkor to‘dasi yangi boyitish inshootlari qurayotganini bezbetlarcha ma’lum qildi.
Bu xatti-harakatlar, ya’ni YQTSHni muntazam buzishdan tortib undan chiqish tahdidlarigacha, Islom Respublikasi rejimi ishonchga sazovor emasligini va muzokaralar ishtirokchisi bo‘la olmasligini yana bir bor isbotladi. Bu rejim bilan har qanday aloqa faqat uni kuchaytiradi”, deydi Rizo Pahlaviy.
Shahzoda Eron xalqini Respublika rejimiga maksimal bosim o‘tkazishga chaqirgan.
“Ammo bu g‘ayriqonuniy rejimga qarshi haqiqiy va umidli muqobil kuch mavjud - bu Eron xalqidir. Qo‘rquvdan xoli tinch va dunyo bilan samarali hamkorlikka asoslangan kelajakni orzu qilayotgan xalq.
Endi tinchlik uchun bir-birini to‘ldiruvchi ikki harakatni amalga oshirish vaqti keldi: birinchidan, Islom Respublikasi rejimiga maksimal bosim o‘tkazish, jumladan BMT Xavfsizlik Kengashining qarorlari va sanksiyalarini tiklash maqsadida “ishga tushirish mexanizmi”ni faollashtirish; ikkinchidan esa, o‘z mamlakatining ozodligi va qaytarilishi uchun mardona va qat’iyat bilan kurashayotgan, rejimning eng ashaddiy dushmani bo‘lgan Eron xalqiga imkon qadar ko‘proq yordam ko‘rsatish”, deydi Eronning so‘nggi shahzodasi.
Rizo Pahlaviy 1967-yildan beri Eronning valiahd shahzodasi bo‘lib, otasi Muhammad Rizo Pahlaviydan so‘ng taxtni egallashi lozim edi, biroq 1979-yildagi Eron Islom inqilobi tufayli oilasi bilan birga Erondan qochishga majbur bo‘lgan.
U hozirgi Erondagi mavjud bo‘lgan ruhoniylar boshqarayotgan islom respublikasining asosiy tanqidchilaridan biri hisoblanadi. Eronda taqiqlangan Eron Milliy Kengashining asoschisi va rahbari sanaladi. Ayni paytda AQSHning Los-Anjeles shahrida istiqomat qilmoqda.
Izoh (0)