Toshkent xalqaro aeroportida uchib ketish terminalida (ro‘yxatdan o‘tish zali) joylashgan “Qo‘noq” brendi ostida kapsula mehmonxonasi ochildi. Bu haqda Uzbekistan Airports xabar berdi.
Maʼlum qilinishicha, endi yo‘lovchilar o‘z parvozlariga ro‘yxatdan o‘tishdan oldin steril bo‘lmagan hududda bemalol dam olishlari mumkin. Mini-mehmonxonada oltita zamonaviy kapsula mavjud — to‘rtta standart bir kishilik kapsula va ikkita oilaviy (ikki kishilik) kapsula.
Har bir kapsula individual yopiq joy bo‘lib, ortopedik matras, choyshablar to‘plami, qulay ortopedik matrasli krovat, individual shamollatish va yoritish tizimlari, “rozetka”lar va zaryadlash moslamalari uchun USB portlar bilan jihozlangan. Mehmonlarga qulaylik yaratish uchun shaxsiy seyf, oyna, kiyim ilgich va soatli ekran mavjud. Kapsula optimal mikroiqlimni saqlab turadi.
Bir kishilik standart kapsula tariflari:
- 4 soatgacha — 400 000 so‘m
- 6 soatgacha — 600 000 so‘m
- 8 soatgacha — 800 000 so‘m.
Ikki kishilik standart kapsula tariflari:
- 4 soatgacha — 600 000 so‘m
- 6 soatgacha — 800 000 so‘m
- 10 soatgacha — 1 mln so‘m.
Maʼlumot uchun, Toshkent aeroporti jo‘nash terminalining steril hududida ham ikki yildan buyon “Qo‘noq” brendi ostida mehmonxona faoliyat ko‘rsatib kelmoqda.
Toshkent xalqaro aeroporti rekonstruksiyasi
Toshkent xalqaro aeroportida keng ko‘lamli qurilish va rekonstruksiya ishlari 2023-yil dekabrda boshlangan edi. Ayni paytda Toshkent xalqaro aeroporti terminalining o‘tkazish qobiliyati yiliga 7 million yo‘lovchini tashkil etadi. Poytaxt aeroportida 6,8 million yo‘lovchiga xizmat ko‘rsatish rejalashtirilgan.
Rekonstruksiyaning ikkinchi bosqichini 2025-yil oxirigacha yakunlash rejalashtirilgan. Uning davomida qo‘shimcha yuk tashish kamarini o‘rnatish, kafelar, do‘konlar va boshqa xizmatlar joylashgan kutib oluvchilar hududini kengaytirish nazarda tutilgan.
Yakuniy bosqich — kelish va jo‘nash zallarini yagona terminal majmuasiga birlashtirish. Ishlar yakunlangach, terminalning umumiy maydoni 10 000 kvadrat metrdan oshadi, o‘tkazish qobiliyati esa soatiga 2400 yo‘lovchiga yetkaziladi.
Mart oyida Andijon xalqaro aeroportida aerodrom rekonstruksiyasining birinchi bosqichi yakunlanib, muntazam yo‘lovchi qatnovlarini qabul qila boshlagandi. May oyi oxirlarida Surxondaryo viloyatidagi Sariosiyo aeroporti 30 yillik uzilishdan so‘ng faoliyatini tikladi.
Izoh (0)