Surxondaryo viloyatidagi Sariosiyo aeroporti 30-may kuni ilk reysni qabul qildi. Bu haqda Uzbekistan Airports xabar berdi.
Maʼlum qilinishicha, Toshkentdan bortida 48 nafar yo‘lovchi bilan uchgan samolyot soat 15:41 da aeroportga kelib qo‘ndi. Toshkent–Sariosiyo–Toshkent muntazam qatnovlar haftasiga ikki marta – chorshanba va juma kunlari amalga oshirilishi rejalashtirilgan.
Aeroportda aerodromning sun’iy yuzalarida, ya’ni uchish-qo‘nish yo‘lagi, burilish yo‘lakchasi va samolyotlar uchun turish joylarida kapital ta‘mirlash ishlari olib borildi. Ushbu rekonstruksiya ishlaridan so‘ng aeroport 29-aprel kuni birinchi texnik parvozni qabul qildi.
Bir oy ichida 1100 kvadrat metr maydon va soatiga 100 nafargacha yo‘lovchiga xizmat ko‘rsatish quvvatiga ega yangi terminal qurish bo‘yicha barcha ishlar yakunlandi.
Maʼlumot uchun, Sariosiyo aeroporti 1995-yilda fuqaro aviatsiyasi uchun yopilgan bo‘lsa, oradan 30 yil o‘tib yana yo‘lovchilarni qabul qila boshladi.
Bugunga qadar Mo‘ynoq, Qo‘qon, Shahrisabz va Zomin aeroportlari rekonstruksiya qilinib, foydalanishga topshirilgan edi.
Izoh (0)