Sudan qurolli kuchlari 2023-yil aprelda mamlakatda mojaro boshlanganidan beri egallab turilgan Xartum aeroportidan Tezkor harakat kuchlarini chiqarib yubordi. Bu haqda Al-Jazeera xabar bermoqda.
“Aeroport mojaroning dastlabki kunlarida THK tomonidan egallab olingan birinchi obyektlardan biri edi. Armiya aeroport ustidan, shu jumladan, fuqaro reyslariga mo‘ljallangan qismi ustidan ham to‘liq nazoratni o‘rnatishga erishdi”, deydi telekanal muxbiri voqea joyidan tayyorlangan reportajida.
Al-Jazeera ma’lumotlariga ko‘ra, harbiylar aeroport atrofidagi bir nechta turar joy hududlarini ham egallab olgan.
Bundan oldin Sudan Qurolli kuchlari Xartumdagi prezident saroyi va Markaziy bankni THKdan tortib olishga, Ko‘k Nil orqali Xartum va Shimoliy Xartumni bog‘laydigan Al-Mansheya ko‘prigi ustidan nazoratni ta’minlashga muvaffaq bo‘lgan edi.
Bu hududda faqat Xartum janubidagi Jabal-Avliyo to‘g‘onidagi shlyuz orqali o‘tadigan ko‘prikkina THK qo‘lida qolmoqda. Mahalliy aholining aytishicha, tezkor harakat kuchlari poytaxtdan janubga, aynan shu yo‘nalishda chekinmoqda.
Sudanda harbiylar va Tezkor harakat kuchlari o‘rtasidagi qurolli mojaro 2023-yil 15-apreldan beri davom etmoqda. Associated Press agentligining xabar berishicha, mojaro oqibatida kamida 28 ming kishi halok bo‘lgan. 14 milliondan ortiq kishi o‘z uylarini tark etishga majbur bo‘lgan.
Izoh (0)