O‘zbekiston terma jamoasi bilan tarixda ilk bor Jahon chempionatiga yo‘l olgan Eldor Shomurodovning AQShga safari 2026-yildan avval boshlanishi mumkin. L’Équipe nashrining xabar berishicha, hujumchi MLS (Major League Soccer) — AQShning eng yuqori darajadagi futbol ligasi klublarining biridan taklif olgan.
Manbaga ko‘ra, taklif yuborgan klub nomi hozircha oshkor qilinmagan. Biroq Rim klubi rahbariyati futbolchining ketishiga qarshi emas, chunki Shomurodovning “Roma” bilan amaldagi shartnomasi 2026-yilning iyunida yakunlanadi. Shu bois, poytaxt jamoasi o‘zbekistonlik futbolchini sotish orqali uning transferidan daromad qilishni maqsad qilgan.
Hujumchining MLSga ko‘chib o‘tishi borasidagi mish-mishlar ilgari ham tarqalgan edi. Avvalroq Shomurodovga AQShning nomdor klublaridan biri — “Atlanta Yunayted” qiziqish bildirgan, biroq transfer noma’lum sabablarga ko‘ra amalga oshmagan.
Shuningdek, Eldorga okeanorti mamlakatlaridan yana bir taklif bor. Xususan, Kanadaning “Toronto” klubi ham Shomurodovga qiziqish bildirgan, biroq futbolchini qo‘lga kirita olmagan. Endi kanadaliklar yozgi transfer oynasi vaqtida Eldor uchun rasmiy taklif jo‘natishga harakat qilishi mumkin.
Ma’lumot uchun, Shomurodov yakuniga yetgan mavsumda “Roma”ning barcha musobaqalar doirasidagi 37 o‘yinida maydonga tushib, 7 ta gol va 5 ta golli uzatmaga mualliflik qilgan. Transfermarkt portali hujumchining transfer qiymatini 4 million yevroga baholagan.
Izoh (0)