“Roma” klubi yaqinda yangi bosh murabbiy nomini e’lon qilishi kutilmoqda. Hozirda jamoani boshqarayotgan tajribali mutaxassis Klaudio Ranyeri mavsum oxirida lavozimini tark etadi va klub tizimida rahbarlik vazifasini bajaradi.
Ranyerining o‘zi bergan ma’lumotga ko‘ra, sport direktori Floran Gisolfi bilan birgalikda yangi murabbiy izlash jarayonida faol qatnashgan. Ular ingliz modeli asosida ish yuritib, dastlabki 7–8 nomzod orasidan 3–4 nafar kuchli murabbiylarni tanlab olishgan.
Yaqin orada klub yangi murabbiy nomini rasman e’lon qiladi, dedi Ranyeri.
Ayni paytda “Roma”ning bo‘lajak murabbiyi sifatida Erik ten Hag nomi tilga olinmoqda. Niderlandiyalik mutaxassis A Seriyaning 31-turidagi “Roma” — “Yuventus” bahsini stadionda tomosha qildi. U klub prezidenti Den Fridkinning shaxsiy mehmoni sifatida uchrashuvga tashrif buyurgani haqida xabarlar tarqaldi.
Shu bilan birga, Ranyeri matbuotda tarqalgan mish-mishlarga ham o‘z munosabatini bildirdi:
Men ten Hag bilan hech qachon uchrashmaganman. Uning bilan ovqatlanganim haqida yozishdi, lekin bu haqiqat emas, dedi mutaxassis.
Ma’lumot uchun, Ten Hagning so‘nggi ish joyi “Manchester Yunayted” hisoblanadi. Mutaxassis yomon natijalar fonida mankunianliklar boshqaruvidan iste’foga chiqarilgan edi.
O‘zbekistonlik hujumchi Eldor Shomurodov 2021-yildan beri “Roma” safida harakat qiladi. Avvalroq u klub bilan shartnomasini 2027-yilga qadar uzaytirishi haqida xabarlar tarqalgan edi.
Izoh (0)